მიმდინარე წლის 27 დეკემბერს სახელმწიფო აუდიტის სამსახურსა და აღმოსავლეთ ევროპის უნივერსიტეტს შორის ურთიერთთანამშრომლობის მემორანდუმი გაფორმდა! მემორანდუმს ხელი მოაწერეს სახელმწიფო აუდიტის სამსახურის უფროსმა ირაკლი მექვაბიშვილმა, სსიპ „საჯარო აუდიტის ინსტიტუტის” დირექტორმა დავით აზმაიფარაშვილმა და აღმოსავლეთ ევროპის უნივერსიტეტის რექტორმა დავით ჩერქეზიშვილმა.
სსიპ „საჯარო აუდიტის ინსტიტუტის“ ახალი პროექტი – „საჯარო სექტორის აუდიტორთა სერტიფიცირების პროგრამა“ მიზნად ისახავს ახალგაზრდა კადრების გადამზადებას საერთაშორისო აუდიტორული სტანდარტების შესაბამისად, საჯარო სექტორის აუდიტორული საქმიანობისთვის შესაბამისი პროფესიის მქონე ბაკალავრებისა და მაგისტრანტების მომზადებას, რომლებსაც სურვილი აქვთ გახდნენ საჯარო სექტორის კვალიფიციური აუდიტორები.
თანამშრომლობა ითვალისწინებს სტუდენტების ხელშეწყობას პროფესიული უნარ-ჩვევების გამომუშავებისა და კვალიფიკაციის ამაღლების მიმართულებით. წარმატებულ კურსდამთავრებულებს მიეცემათ შესაძლებლობა გაიარონ სტაჟირება სახელმწიფო აუდიტის სამსახურში.
საჯარო სექტორის აუდიტის სასწავლო პროგრამის დასრულების შემდეგ, შესაბამისი გამოცდის წარმატებით ჩაბარების შედეგად, გაიცემა საჯარო სექტორში აუდიტორული მომსახურების გაწევის უფლების დამადასტურებელი ხუთწლიანი სერტიფიკატი. სასწავლო კურსის ხანგძლივობა 3 თვეს შეადგენს.
➡პროექტის ფარგლებში, ურთიერთთანამშრომლობის მემორანდუმები სახელმწიფო აუდიტის სამსახურმა აღმოსავლეთ ევროპის უნივერსიტეტთან ერთად საქართველოს 7 უმაღლეს სასწავლებელთან გააფორმა.