განათლების მეცნიერებების მაგისტრი
ეკატერინე ბენიაშვილი 2015-2018 წლებში სწავლობდა აღმოსავლეთ ევროპის უნივერსიტეტში და წარჩინებით დაასრულა განათლების კვლევებისა და ადმინისტრირების სამაგისტრო პროგრამა. უნივერსიტეტში სწავლის პერიოდში მოიპოვა Erasmus+ სრული დაფინანსება და გაცვლითი პროგრამით იმყოფებოდა ავსტრიაში, ქალაქ ლინცში, ზემო ავსტრიის განათლების უნივერსიტეტში.
,,ოთხი თვე გავატარე 10 სხვადასხვა ქვეყნიდან ჩამოსულ სტუდენტებთან ერთად. მე არც პირველი ვარ და არც ბოლო, ვინც ERASMUS+ გაცვლითი პროგრამის ფარგლებში აღმოსავლეთ ევროპის უნივერსიტეტიდან ავსტრიაში წავიდა სრული დაფინანსებით. ეს საუკეთესო რამაა ჩვენთვის და მნიშვნელოვანია, გამოიყენოთ ყველა შესაძლებლობა, რომელსაც უნივერსიტეტი გვთავაზობს… მინდა ვისურვო, რომ გაცვლით პროგრამებში მონაწილეობის შესაძლებლობა ბევრ სტუდენტს, განსაკუთრებით კი, მომავალი განათლების სპეციალისტებს მიეცეს, მე ამ თვალსაზრისით ნამდვილად გამიმართლა და მადლიერი ვარ ჩვენი უნივერსიტეტის.”
ეკატერინე ბენიაშვილმა EEU-ში გაიარა შიდა საუნივერსიტეტო სტაჟირების პროგრამა და 2017 წლიდან არის აღმოსავლეთ ევროპის უნივერსიტეტში სასწავლო პროცესის ადმინისტრირების და სტუდენტური სერვისების განყოფილების კოორდინატორი
ეკატერინე ბენიაშვილი სწავლის პერიოდში აქტიურად იყო ჩართული საუნივერსიტეტო სტუდენტურ ცხოვრებაში და მონაწილეობდა კონფერენციებში, ტრენინგებში, ზამთრის სკოლებში. არის სტუდენტური სამეცნიერო კონფერენციის „ევროინტეგრაციის აქტუალური საკითხები” გამარჯვებული. სწავლის პერიოდიდან აქტიურად მუშაობს გენდერულ და უმაღლესი განათლების ინტერნაციონალიზაციის საკითხებზე. დღემდე აქტიურად აგრძელებს კვლევით საქმიანობას და 2019 წელს, ზემო ავსტრიის განათლების უნივერსიტეტის პროფესორ იან ბოემთან ერთად გამოაქვეყნა სტატია აღმოსავლეთ ევროპის უნივერსიტეტის სამეცნიერო შრომების საერთაშორისო კრებულში.
სწავლის პერიოდში ასევე გავლილი აქვს სახელმწიფო სტაჟირების პროგრამა მასწავლებელთა პროფესიული განვითარების ეროვნულ ცენტრში, ტრენინგები (შედარებითი (კომპარატივისტული) განათლება), ზამთრის სკოლები (ტოლერანტობისა და ინტერკულტურული განათლების სკოლა). ეკატერინე ბენიაშვილი დღემდე აქტიურად თანამშრომლობს უნივერსიტეტთან და ჩართულია პროფესიული განვითარების პროგრამებში.