განათლების მეცნიერებების მაგისტრი
გიორგი თათანაშვილი 2017-2020 წლებში სწავლობდა აღმოსავლეთ ევროპის უნივერსიტეტში, განათლების კვლევებისა და ადმინისტრირების სამაგისტრო პროგრამაზე. 2020 წელს მიენიჭა განათლების მეცნიერებების მაგისტრის აკადემიური ხარისხი. ხარისხის მისაღებად სპეციალურ კომისიას წარუდგინა სამაგისტრო ნაშრომი სახელწოდებით: „ინტერპერსონალური ურთიერთობების გავლენა ადმინისტრაციული პერსონალის შრომით კმაყოფილებაზე უმაღლეს საგანმანათლებლო დაწესებულებებში“. აღსანიშნავია, რომ გიორგი თათანაშვილმა აღმოსავლეთ ევროპის უნივერსიტეტში სწავლის მეორე წელს მოიპოვა Erasmus+ სრული დაფინანსება და გაცვლითი პროგრამით გაემგზავრა ავსტრიაში, ქალაქ ლინცში, ზემო ავსტრიის განათლების უნივერსიტეტში, სადაც 1 სემესტრის განმავლობაში სწავლობდა. გარდა ამისა, ამავე პროგრამის ფარგლებში გაიარა სასკოლო პრაქტიკის კურსი, სადაც დააგროვა მნიშვნელოვანი პედაგოგიური გამოცდილება რეალურ სასწავლო გარემოში.
გაცვლით პროგრამაში წარმატებული მონაწილეობის შემდეგ, გიორგი თათანაშვილი მალევე დასაქმდა აღმოსავლეთ ევროპის უნივერსიტეტში და 2019 წლიდან არის აღმოსავლეთ ევროპის უნივერსიტეტის ჯანდაცვის მეცნიერებათა ფაკულტეტის სპეციალისტი.
გიორგი თათანაშვილი სწავლის პერიოდში აქტიურად იყო ჩართული საუნივერსიტეტო სტუდენტურ ცხოვრებაში, მონაწილეობდა სხვადასხვა საგანმანათლებლო და კვლევით აქტივობებში. მაგალითისთვის, 2019 წლის სტუდენტურ კონფერენციაზე: „ინოვაციების მნიშვნელობა ქვეყნის განვითარებისთვის“, რომელიც აღმოსავლეთ ევროპის უნივერსიტეტის ორგანიზებით ჩატარდა, წარადგინა მოხსენება სახელწოდებით: „სასკოლო განათლების სისტემაში შებრუნებული კლასის სასწავლო მეთოდის დანერგვის მნიშვნელობა ადამიანური კაპიტალის განვითარებისთვის“.