საქპატენტი ინტელექტუალური საკუთრების სფეროთი დაინტერესებულ ნებისმიერ პირს, გაძლევთ შესაძლებლობას დისტანციურად, უფასოდ და ქართულ ენაზე გაიაროთ ინტელექტუალური საკუთრების ზოგადი კურსი, მიიღოთ საერთაშორისო სერტიფიკატი და, სურვილის შემთხვევაში, განაგრძოთ ინტელექტუალური საკუთრების მსოფლიო ორგანიზაციის სხვა სპეციალიზებული კურსების შესწავლა.
ინტელექტუალური საკუთრების ზოგადი კურსი (DL101GE) – ინტელექტუალური საკუთრების მსოფლიო ორგანიზაციის (WIPO) აკადემიის დისტანციური სწავლების კურსია, რომელიც განკუთვნილია ინტელექტუალური საკუთრების დარგით დაინტერესებული ნებისმიერი პირისთვის.
კურსის ფარგლებში, სტუდენტები მიიღებენ ცოდნას ინტელექტუალური საკუთრების შემდეგ ძირითად მიმართულებებში: საავტორო უფლებები, სასაქონლო ნიშნები, გეოგრაფიული აღნიშვნები, დიზაინი, პატენტები და ახალი ჯიშები, ინტელექტუალური საკუთრება და განვითარება, არაკეთილსინდისიერი კონკურენცია, ინტელექტუალური საკუთრების სფეროში მოქმედი საერთაშორისო ხელშეკრულებები და სხვა.
კურსი მოიცავს 12 მოდულს, რომლებსაც მოჰყვება საბოლოო გამოცდა.
კურსის წარმატებით დასრულების შემდეგ, კურსდამთავრებულებს გადაეცემათ ინტელექტუალური საკუთრების მსოფლიო ორგანიზაციის (WIPO) სერტიფიკატები, რომელთა საფუძველზეც მათ მიეცემათ შესაძლებლობა, გაიარონ WIPO-ს აკადემიის სხვა მაღალი საფეხურის კურსები ინტელექტუალური საკუთრების ცალკეულ დარგებში.
რეგისტრაცია შესაძლებელია 29 აპრილის ჩათვლით.
სრული ინფორმაციისთვის და რეგისტრაციის გასავლელად გადადით ბმულზე: http://www.sakpatenti.gov.ge/ka/page/181/
საორგანიზაციო და ადმინისტრაციული ხასიათის შეკითხვების შემთხვევაში, მიმართეთ კურსის ადმინისტრატორთა გუნდს შემდეგ მისამართზე: DL101GE@sakpatenti.org.ge