აღმოსავლეთ ევროპის უნივერსიტეტმა მონაწილეობა მიიღო საქართველოს განათლების გამოფენაში, რომელიც ინდოეთის სამ ქალაქში, მუმბაიში, ბენგალორსა და ჩენაიში საქართველოს საელჩოს ორგანიზებითა და მხარდაჭერით გაიმართა. გამოფენამ 11 ქართულ უნივერსიტეტს უმასპინძლა. გამოფენის თანაორგანიზატორი საელჩოსთან ერთად აღმოსავლეთ ევროპის უნივერსიტეტი იყო.
გამოფენა მიზნად ისახავდა საქართველოს, როგორც საგანმანათლებლო ჰაბის პოპულარიზაციასა და საქართველოში სწავლის გაგრძელების მსურველთათვის უმაღლესი საგანმანათლებლო დაწესებულებების პროგრამების, შეთავაზებებისა და სხვა შესაძლებლობების გაცნობას.
აღმოსავლეთ ევროპის უნივერსიტეტის სახელით გამოფენაში მონაწილეობა მიიღეს უნივერსიტეტის ვიცე-რექტორმა საერთაშორისო და ადმინისტრაციულ საკითხებში, თეა იმედაძემ, ბიზნესისა და ინჟინერიის ფაკულტეტის დეკანის მოადგილემ, თამთა ლეკიშვილმა, ჯანდაცვის მეცნიერებათა ფაკულტეტის დეკანის მოადგილემ, ელენე ზურაბიშვილმა და ამავე ფაკულტეტის კოორდინატორმა, გიორგი თათანაშვილმა.
გამოფენას ესწრებოდნენ საქართველოში სწავლის გაგრძელების მსურველები, ადგილობრივი უნივერსიტეტების წარმომადგენლები და მომზიდავი კომპანიები როგორც ინდოეთიდან, ასევე სხვა აზიური ქვეყნებიდან.
EEU-ს წარმომადგენლებმა დამსწრე საზოგადოებას გააცნეს უნივერსიტეტის საგანმანათლებლო პროგრამები, უპირატესობები და შეთავაზებები. გამართეს მრავალი შეხვედრა დაინტერესებულ პირებთან და სხვადასხვა ადგილობრივ ორგანიზაციებთან, რაც უნივერსიტეტის მომავალი ნაყოფიერი თანამშრომლობისა და საერთაშორისო ასპარეზზე წარმატების საწინდარია.
აღსანიშნავია, ეს იყო ინდოეთში საქართველოს განათლების რიგით მეორე გამოფენა. გამოფენამ წარმატებით ჩაიარა და დამსწრე საზოგადოების დიდი დაინტერესება გამოიწვია.
აღმოსავლეთ ევროპის უნივერსიტეტი მადლობას უხდის საქართველოს საელჩოს და ელჩს, ბატონ არჩილ ძულიაშვილს გამოფენის ორგანიზებისა და მხარდაჭერისთვის!
