აღმოსავლეთ ევროპის უნივერსიტეტში (EEU) განათლების მეცნიერებების ფაკულტეტის პროფესორ პოლ გიბსისთვის ემერიტუსის აკადემიური წოდების მინიჭების ღონისძიება გაიმართა.
ემერიტუსი პროფესორის წოდების მინიჭების ცერემონიას წინ უძღოდა პროფესორ პოლ გიბსის საინაუგურაციო ლექცია და მისი ხელმძღვანელობით გამოცემული აღმოსავლეთ ევროპის უნივერსიტეტისა და სორბონის უნივერსიტეტის (საფრანგეთი) ერთობლივი საერთაშორისო სამეცნიერო ჟურნალის პრეზენტაცია.
აღნიშნული პრეზენტაცია პოლ გიბსმა წარმოადგინა ჟურნალის რედაქტორთან, სორბონის უნივერსიტეტის კვლევითი ცენტრის უფროსთან, პროფესორ ლუიზ დელინგუოთერთან ერთად, ასევე, წარმოადგინეს გამოქვეყნებული სტატიების პრეზენტაციები EEU-ს დოქტორანტებმა;
პოლ გიბსის თაოსნობით აღმოსავლეთ ევროპის უნივერსიტეტში დაარსდა სადოქტორო და უმაღლესი განათლების კვლევების განვითარების ცენტრი, ასევე მიდლსექსის უნივერსიტეტთან ერთად განათლების ფაკულტეტზე შეიქმნა ერთობლივი განათლების სადოქტორო პროგრამა, ჩატარდა არაერთი საერთაშორისო სამეცნიერო კონფერენცია, განხორციელდა სამეცნიერო-კვლევითი პროექტები და გამოიცა საერთაშორისო სტატიები. იგი დღემდე არის აღმოსავლეთ ევროპის უნივერსიტეტის სამეცნიერო ჟურნალის ,,სამეცნიერო შრომების კრებულის” სარედაქციო კოლეგიის წევრი და მისი ხელმღვანელობით აღმოსავლეთ ევროპის უნივერსიტეტის სტუდენტები წარმატებით აქვეყნებენ სამეცნიერო სტატიებს საერთაშორისო ჟურნალებში;
პოლ გიბსს აღმოსავლეთ ევროპის უნივერსიტეტში ემერიტუსი პროფესორის აკადემიური წოდების მინიჭება მიულოცეს და შესაბამისი საჩუქრები გადასცეს უნივერსიტეტის რექტორმა კახაბერ ლაზარაშვილმა და აკადემიური კოლეგიის თავჯდომარემ დავით ჩერქეზიშვილმა. ღონისძიებას მოწვეულ სტუმრებთან ერთად დოქტორანტები, მკვლევარები, სტუდენტები, აკადემიური პერსონალი და უნივერსიტეტის ადმინისტრაციის წარმომადგენლები ესწრებოდნენ.
პოლ გიბსი არის ცნობილი ბრიტანელი მეცნიერი და მკვლევარი, მიდლსექსის უნივერსიტეტის (UK) განათლების კვლევებისა და სტიპენდიების ცენტრის დამაარსებელი. ასევე, არის სიდნეის უნივერსიტეტის (UTS) და კემბრიჯის უნივერსიტეტის (UK) მოწვეული პროფესორი, კვლევითი ინსტიტუტის ATLAS R&B-ის (TEXAS, USA) და New College Oxford-ის უმაღლესი განათლების პოლიტიკის ცენტრის მეცნიერ-თანამშრომელი, პედაგოგი და მკვლევარი. პოლ გიბსის ავტორობით გამოცემულია ოცზე მეტი წიგნი, იგი არის 110-ზე მეტი საერთაშორისო სამეცნიერო პუბლიკაციის ავტორი და საერთაშორისო სამეცნიერო გამოცემების SpringerBriefs-ის სერიის რედაქტორი.
