2014 წლის 7 მარტს აღმოსავლეთ ევროპის სასწავლო უნივერსიტეტში გაფორმდა თანამშრომლობის მემორანდუმი აღმოსავლეთ ევროპის უნივერსიტეტსა და სსიპ იურიდიული დახმარების სამსახურს შორის. თანამშრომლობის მემორანდუმს ხელი მოაწერეს სსიპ იურიდიული დახმარების სამსახურის დირექტორმა, მელიტონ ბენიძემ, და აღმოსავლეთ ევროპის სასწავლო უნივერსიტეტის რექტორმა, დავით ჩერქეზიშვილმა.
იურიდიული კლინიკის პროგრამის მიხედვით, იურიდიული ფაკულტეტის საბაკალავრო და სამაგისტრო პროგრამის სტუდენტები, საზოგადოებრივი ადვოკატების ხელმძღვანელობით, რეალურ კლიენტებს შეხვდებიან და კონკრეტულ სისხლის სამართლის საქმეებთან დაკავშირებით სხვადასხვა სამართლებრივ დოკუმენტებს მოამზადებენ. გარდა ამისა, მათ სასამართლოს, პროკურატურის, სასჯელაღსრულების დაწესებულებებისა და სხვა ორგანოებთან პროფესიული ურთიერთობის საშუალებაც მიეცემათ. პროგრამის დასკვნით ფაზაზე სტუდენტები მოაწყობენ იმიტირებულ სასამართლო პროცესს, რაც ხელს შეუწყობს სტაჟიორებს, წარმოაჩინონ სისხლის სამართლის საქმის წარმოების პრაქტიკული უნარ-ჩვევები, სამართლებრივ დოკუმენტებზე მუშაობის გამოცდილება და თეორიული ცოდნა.