აღმოსავლეთ ევორპის უნივერსიტეტმა მეცნიერებისა და ინოვაციების თბილისის ფესტივალი 2016-ში მიიღო მონაწილეობა. ღონისძიება დღეს ‘’ექსპო ჯორჯიაში’’ საზეიმოდ გაიხსნა. ფესტივალის მიზანი ახალგაზრდების მეცნიერებით დაინტერესება, მეცნიერების პრესტიჟის გაზრდა და მისი პოპულარიზაციაა.
აღმოსავლეთ ევროპის უნივერსიტეტმა ფესტივალზე ცოდნის სამკუთხედის კონცეფცია წარადგინა, რომელიც უმაღლესი განათლების, კვლევისა და ბიზნესის უწყვეტ კავშირს ითვალისწინებს. გამოფენის ფარგლებში უნივერსიტეტის საგამოფენო სივრცეში დამთვალიერებელს შეეძლო გაცნობოდა სამართლის სადოქტორო პროგრამის ფარგლებში გამოცემულ ნაშრომებს და სახელმძღვანელოებს, აგრობიზნესის მენეჯმენტის და არქიტექტურის მიმართულების წარმოდგენილ ინოვაციურ პროექტებს, რომელიც უშუალოდ დაკავშირებულია სასწავლო პროგრამებთან და აგებულია თანამედროვე ტექნოლოგიებზე. EEU-ს საგამოფენო სივრცეს საქართველოს განათლებისა და მეცნიერების მინისტრი, ალექსანდრე ჯეჯელავა ესტუმრა და დამთვალიერებლებთან ერთად ცოდნის სამკუთხედის არსს, უნივერსიტეტს გამოცემულ ნაშრომებსა და ახალ პროექტებს გაეცნო.
ფესტივალის ფარგლებში 21 სექტემბერს იმართება კონფერენცია აგრარული მეცნიერების მიმართულებით და ასევე 25 სექტემბერს სტუდენტური კონფერენცია, სადაც აღმოსავლეთ ევროპის უნივერსიტეტი მონაწილეობს, როგორც ერთ-ერთი თანაორაგანიზატორი.
ნებისმიერ მსურველს შესაძლებლობა აქვს ცხრა დღის განმავლობაში დაესწროს, როგორც აღნიშნულ კონფერენციებს, ასევე მონაწილეობა მიიღოს სხვადასხვა საინტერესო ღონისძიებებში, როგორიცაა პრეზენტაციები, საჯარო ლექციები, კონფერენციები, გასართობი ღონისძიებები და სხვა. ფესტივალი საზეიმოდ 25 სექტემბერს, გრანდიოზული კონცერტით დაიხურება.