ადამიანური რესურსების მართვის მაგისტრი
ანა ბიკაშვილი 2018-2020 წლებში სწავლობდა აღმოსავლეთ ევროპის უნივერსიტეტში და წარჩინებით დაასრულა ადამიანური რესურსების მართვის სამაგისტრო პროგრამა. ანა სწავლის პერიოდში აქტიურად იყო ჩართული საუნივერსიტეტო ცხოვრებაში, მონაწილეობდა საერთაშორისო კონფერენციებში, კონკურსებსა და ტრენინგებში.
მან მონაწილეობა მიიღო ,,HR პროფესიონალთა გილდიისა” და აღმოსავლეთ ევროპის უნივერსიტეტის მიერ ორგანიზებულ VII საერთაშორისო კონფერენციაში – „HR გამოწვევები“ და წარადგინა კვლევა – „შრომის ბაზრის მიმოხილვა თაობათა ჭრილში“.
აღნიშნული სამაგისტრო პროგრამის ფარგლებში გაიარა პრაქტიკა „ლუდსახარში ნატახტარის“ (EFES Georgia) HR დეპარტამენტში, სადაც პრაქტიკულად გაეცნო ადამიანური რესურსების მართვის საერთაშორისო სისტემებსა და პრაქტიკებს.
2020 წელს მან შეიმუშავა ინოვაციური პერსონალური პროექტი „მწვანე HR მენეჯმენტი“. ამჟამადაც, აქტიურად მუშაობს აღნიშნული პრაქტიკის განვითარებასა და საქართველოს შრომის ბაზარზე დამკვიდრებაზე.
„აღნიშნულმა სამაგისტრო პროგრამამ შესაძლებლობა მომცა, მიმეღო კვლევებზე დაფუძნებული ცოდნა, განმევითარებინა პროფესიული უნარები, გავცნობოდი საერთაშორისო HR პრაქტიკებს და მნიშვნელოვნად გამეზარდა პროფესიული კონტაქტების წრე.
მინდა აღვნიშნო, რომ ეს არის კომპლექსური სამაგისტრო პროგრამა, სადაც შესაძლებლობა მქონდა გარდა პროფილური მიმართულებისა, ასევე შემესწავლა ფინანსური და სტრატეგიული მენეჯმენტის საფუძვლები, მარკეტინგული და სტატისტიკური ანალიზი, კვლევის მეთოდები და ა.შ., რომელთა ცოდნაც ძალზედ მნიშვნელოვანია HR პროფესიონალისთვის, რომ მოახერხოს კომპანიაში არსებული ვითარების მთლიანი სურათის აღქმა და სტრატეგიული მიზნების განსაზღვრა/განხორციელება.
აღნიშნული სამაგისტრო პროგრამის შემდგომ დავრწმუნდი, რომ ადამიანური რესურსების მართვა არის მრავალფეროვანი და ამოუწურავი სფერო, სფერო ადამიანიდან – ფსიქოლოგიამდე, ფსიქოლოგიიდან – ფილოსოფიამდე, ფილოსოფიიდან – სამყაროს არსამდე და ა.შ.“