საქართველოს პარლამენტში, გაეროს დღისადმი და გაეროში საქართველოს გაწევრიანების 25 წლის იუბილესთან დაკავშირებით სტუდენტური კონფერენცია გაიმართა, რომელშიც მონაწილეობას იღებდა აღმოსავლეთ ევროპის უნივერსიტეტის საერთაშორისო ურთიერთობების საბაკალავრო პროგრამის სტუდენტი ვახტანგ ჟღენტი.
კონფერენციის მონაწილეებს და მოწვეულ სტუმრებს მისასალმებელი სიტყვით მიმართეს სტუდენტური კონფერენციის ინიციატორმა, საგარეო ურთიერთობათა კომიტეტის თავმჯდომარემ, სოფიო ქაცარავამ, საქართველოს პარლამენტის თავმჯდომარემ, ირაკლი კობახიძემ, განათლების, მეცნიერებისა და კულტურის კომიტეტის თავმჯდომარემ მარიამ ჯაშმა, გაეროს მუდმივმა კოორდინატორმა და გაეროს განვითარების მუდმივმა წარმომადგენელმა საქართველოში, ნილს სკოტმა და საგარეო საქმეთა მინისტრის მოადგილემ, ვახტანგ მახარობლიშვილმა.
კონფერენციაზე სტუდენტები სხვადასხვა თემებზე მოხსენებებით წარდგნენ: „გაეროს როლი საქართველოში მშვიდობის დამყარების პროცესში: ჟენევის მოლაპარაკებები“; „ახლო აღმოსავლეთში ტერორიზმთან ბრძოლის გამოწვევები გაეროსთვის და გავლენა საქართველოზე“; „გაერო და საქართველო“; „საქართველო და კლიმატის ცვლილების პარიზის შეთანხმება“; “უსაფრთხოების კომიტეტის რეზოლუცია 2250“; „გაერო, როგორც გენდერული თანასწორობის პოლიტიკის კატალიზატორი საქართველოში“.
აღმოსავლეთ ევროპის უნივერსიტეტის საერთაშორისო ურთიერთობების სტუდენტ ვახტანგ ჟღენტის მოხსენებამ ,,საქართველო და კლიმატის ცვლილების პარიზის შეთანხმება’’ დამსწრეთა განსაკუთრებული ინტერესი და დისკუსია გამოიწვია.
სტუდენტი ვახტან ჟღენტი აღნიშნავს, რომ კონფერენციამ მისცა პრაქტიკული ცოდნა და შესაძლებლობა გაცნობოდა ექსპერტების, პარლამეტის წევრებისა და სხვადასხვა უნივერსიტეტის სტუდენტთა ხედვებს, კონფერენციამ ხელი შეუწყო შემდგომი ურთიერთობების გაღრმავებას.
საგარეო ურთიერთობათა კომიტეტის თავმჯდომარემ მადლობა გადაუხადა ყველა მონაწილეს კონფერენციაში აქტიური მონაწილეობისთვის და შესაბამისი სერტიფიკატები გადასცა.