2017 წლის 4-9 მაისს, შვეიცარიის კონფედერაციის ლუცერნის კანტონში, შვეიცარიის ტურიზმისა და სასტუმროს მენეჯმენტის ინსტიტუტის (HTMi) მოწვევით, სამუშაო ვიზიტით იმყოფებოდა აღმოსავლეთ ევროპის უნივერსიტეტის დელეგაცია.
ვიზიტის მიზანი გახლდათ HTMi – ის სასწავლო და სტაჟირების პროგრამების გაცნობა და უნივერსიტეტებს შორის ერთობლივი საქმიანობის დაწყება.
2017 წლის 5 მაისს გაიმართა ხელმოწერა ურთიერთთანამშრომლობის მემორანდუმზე შვეიცარიის ტურიზმისა და სასტუმროს მენეჯმენტის ინსტიტუტსა (HTMi) და აღმოსავლეთ ევროპის უნივერსიტეტს (EEU) შორის. ხელმოწერის ცერემონიაზე მიწვეული იყო, მონაწილეობა მიიღო და საქართველოს საელჩოს წარმოადგენდა საელჩოს უფროსი მრჩეველი ბატონი ილია მარჯანიძე.
თანამშრომლობის მემორანდუმს ხელი მოაწერეს შვეიცარიის, ტურიზმისა და სასტუმროს მენეჯმენტის ინსტიტუტის(HTMi) მმართველმა დირექტორმა იან ლარმურმა და აღმოსავლეთ ევროპის უნივერსიტეტის რექტორმა (EEU) დავით ჩერქეზიშვილმა.
აღნიშნული მემორანდუმი ითვალისწინებს ქართველი სტუდენტებისთვის HTMi-ში სწავლისა და შვეიცარიის კონფედერაციაში სასწავლო პრაქტიკისა და სტაჟირების გავლის შესაძლებლობას, პედაგოგებისა და სტუდენტების ვიზიტებს, აღმოსავლეთ ევროპის უნივერსიტეტის ბაზაზე ტურიზმისა და სასტუმროს მენეჯმენტის ერთობლივი სასწავლო პროგრამის შექმნას.
აღმოსავლეთ ევროპის უნივერსიტეტთან ერთად, ხელი მოეწერა მემორანდუმს ტურიზმისა და სასტუმროს მენეჯმენტის ინსტიტუტსა (HTMi) და ბუდაპეშტის საერთაშორისო ბიზნეს სკოლას (IBS) შორის.
ხელმოწერის ცერემონიებს საქართველოს საელჩოსთან ერთად ესწრებოდა და წარმოდგენილი იყო შვიდი ქვეყნის საელჩო, აგრეთვე მოწვეული სტუმრები და HTMi – ის პარტნიორი კომპანიებისა და აკადემიური სფეროს წარმომადგენლები.
მემორანდუმების გაფორმების შემდეგ გაიმართა საზეიმო ვახშამი.
