მიდლსექსისა და აღმოსავლეთ ევროპის უნივერსიტეტებს შორის გაფორმებული ხელშეკრულება მოიცავს სპეციალური მხარდაჭერის პირობებს, კერძოდ, აღმოსავლეთ ევროპის უნივერსიტეტის (EEU) ახლად შექმნილ სადოქტორო კვლევების განვითარების ცენტრში მიდლსექსის უნივერსიტეტის უშუალო ჩართულობას, მხარდაჭერასა და EEU-ში განათლების მეცნიერებების სადოქტორო პროგრამის დანერგვას. სადოქტორო კვლევების განვითარების ცენტრში საქმიანობას განახორციელებენ ბრიტანელი და ქართველი სპეციალისტები, ხოლო ცენტრს უხელმძღვანელებს პროფესორი პოლ გიბსი.
აღმოსავლეთ ევროპის უნივერსიტეტის განათლების მეცნიერებების სადოქტორო პროგრამა ინერგება მიდლსექსის უნივერსიტეტის განათლების მეცნიერებების სადოქტრო პროგრამის ანალოგიით და პროგრამაში ჩართულნი არიან მიდლსექსის უნივერსიტეტის პროფესორები, რომლებიც გაუძღვებიან სასწავლო კურსებს, უხელმძღვანელებენ დოქტორანტებს და აღნიშნულ პროგრამას უხელმძღვანელებს ბრიტანელი პროფესორი. მხარდაჭერის ფარგლებში, EEU-ს სტუდენტებს მიდლსექსის უნივერსიტეტის სასწავლო და სამეცნიერო მასალებზე სრული წვდომის შესაძლებლობა მიეცათ. ასევე, სტუდენტები შეძლებენ სადოქტორო პროგრამის ფარგლებში მიდლსექსის უნივერსიტეტში ნებისმიერი მოდულის (სასწავლო/სამეცნიერო) გავლას და შესაბამისი სერტიფიკატის მიღებას.
განათლების მეცნიერებების სადოქტორო პროგრამაზე ერთობლივი მუშაობის პირველი ეტაპი დასასრულს უახლოვდება, პროგრამის აკრედიტაციის პროცესი უახლოეს პერიოდში დაიწყება. მხარეების მიერ დაგეგმილია ერთობლივი სამეცნიერო პროექტების განხორციელება.