ფრაიბურგის, მაქს პლანკის მსოფლიო და საერთაშორისო სისხლის სამართლის ინსტიტუტის პროფესორმა და სამართლებრივი რეფორმების კვლევის განყოფილების ხელმძღვანელმა, ელიკო წიკლაური-ლამიხმა აღმოსავლეთ ევროპის უნივერსიტეტის სტუდენტებისთვის საჯარო ლექცია წაიკითხა თემაზე: “ტრანზიციული ქვეყნები და სამართალი”. შეხვედრისას განხილული იყო ისეთი საკითხები, რომლებიც შეეხება სახელმწიფოს სისტემურ ცვლილებებს და წარმოდგენილი იყო თანამედროვე გერმანიის მაგალითი, რომელმაც სისტემური წყობა, სამართლებრივი ნორმები და ფასეულობები სამჯერ შეიცვალა: პირველი და მეორე მსოფლიო ომებისა და საბჭოთა კავშირის დაშლის შემდეგ.
ელიკო წიკლაური-ლამიხი განვითარებული და განვითარებადი სახელმწიფოების, ასევე მესამე სამყაროს – სიღარიბის ყველაზე მაღალი მაჩვენებლების მქონე ქვეყნებსა და მათ ღირებულებათა სისტემასაც შეეხო. ისაუბრა ევროკავშირისა და საქართველოს ურთიერთობებზე და საქართველოს, როგორც განვითარებადი ქვეყნის პერსპექტივებსა და გამოწვევებზე, გახდეს ევროკავშირის სრულუფლებიანი წევრი.
შეხვედრას, რომელიც კითხვა-პასუხის რეჟიმში ორი საათის განმავლობაში მიმდინარეობდა, სტუდენტებთან ერთად აღმოსავლეთ ევროპის უნივერსიტეტის რექტორი, დავით ჩერქეზიშვილი და აკადემიური პერსონალის წარმომადგენლები ესწრებოდნენ.