სრულიად საქართველოს კათოლიკოს-პატრიარქი, მთავარეპისკოპოსი მცხეთა-თბილისისა და მიტროპოლიტი ბიჭვინთისა და ცხუმ-აფხაზეთისა, ილია მეორე საპატრიარქოში, უნივერსიტეტების რექტორებს, სტუდენტებსა და თვითმმართველობების წარმომადგენლებს შეხვდა.
„უფალი სუფევს, უფალი მეფობს, უფალი იცავს საქართველოს იმიტომ, რომ საქართველო არის წილხვედრი ქვეყანა ყოვლადწმინდა ღვთისმშობლისა. ახლა მიდის მსჯელობა იმის შესახებ, რომ საქართველო მსოფლიოში გამოცხადდეს, როგორც წილხვედრი ღვთისმშობლისა და დაწესდეს დიდი საზეიმო დღესასწაული. მინდა ვთქვა, რომ აქ ახალგაზრდები არიან, რექტორები ბრძანდებიან, თქვენ მუდამ იქონიეთ საერთო ენა. ახალგაზრდებმა ყველაფერი უნდა გააკეთონ იმისათვის, რომ ერთსულოვნება იყოს უფროსსა და უმცროს თაობებს შორის. ეს იქნება ღვთის მადლით. ყველას გლოცავთ გისურვებთ სულიერ ძალას. მადლი უფლისა ჩვენისა გფარავდეთ თქვენ და სრულიად საქართველოს”, – განაცხადა პატრიარქმა შეხვედრაზე, რომელსაც აღმოსავლეთ ევროპის უნივერსიტეტის რექტორი, დავით ჩერქეზიშვილი თვითმმართველობის ვიცე-პრეზიდენტთან, დავით ჩოჩნიძესთან ერთად დაესწრო.
სტუმრებს პატრიარქისგან სამახსოვრო საჩუქრები გადაეცათ. აღნიშნული შეხვედრა საქართველოს სტუდენტური ორგანიზაციების ასოციაციის ორგანიზებით შედგა.
