აღმოსავლეთ ევროპის უნივერსიტეტსა და ტუშას უნივერსიტეტს (იტალია) შორის თანამშრომლობის მემორანდუმი გაფორმდა. მემორანდუმს ხელი აღმოსავლეთ ევროპის უნივერსიტეტის რექტორმა, დავით ჩერქეზიშვილმა და ტუშას უნივერსიტეტის რექტორმა, სტეფანო უბერტინიმ მოაწერეს.
მემორანდუმი ითვალისწინებს თანამშრომლობის გაძლიერებას ისეთ სფეროებში, როგორებიცაა მეცნიერება, ტექნოლოგიები და განათლება, რაც ხელს შეუწყობს ცოდნის, გამოცდილების, ინოვაციური პროდუქტებისა და სერვისების გაზიარებას. მემორანდუმის ფარგლებში მოხდება სხვადასხვა ერთობლივი პროექტების შემუშავება, ერთობლივი კვლევების განხორციელება, სასწავლო მასალების, სამეცნიერო და კვლევითი ლიტერატურის გაცვლა და სხვა. პერსონალსა და სტუდენტებს შესაძლებლობა ექნებათ ჩაერთონ გაცვლით პროგრამებში, აიმაღლონ კვალიფიკაცია და მიიღონ დაუვიწყარი გამოცდილება.
ტუშას უნივერსიტეტი 1979 წელს დაარსდა და დღესდღეობით იტალიის ცნობილ უნივერსიტეტებს შორისაა. იგი სამართლიანად ითვლება რეგიონის კულტურისა და სწავლების ცენტრად. ტუშას უნივერსიტეტს 6 ფაკულტეტი, 15 საბაკალავრო, 17 სამაგისტრო და შვიდი სადოქტორო პროგრამა აქვს. ულამაზესი გარემო და სწავლების მაღალი ხარისხი სტუდენტებსა და პერსონალს ახალ შესაძლებლობებსა და გამოცდილებას სთავაზობს.
უნივერსიტეტის შესახებ დამატებითი ინფორმაციისათვის იხილეთ ბმული: http://www.unitus.it/en/unitus/ateneo/articolo/cenni-storici