დღეს, აღმოსავლეთ ევროპის უნივერსიტეტის ორგანიზებით, მინი ფეხბურთში სასკოლო ტურნირის ფინალი გაიმართა. ტურნირი EEU-ს ორგანიზებით მეოთხე წელია ტარდება. ფინალში გამარჯვებულის სტატუსისთვის მე-14 და მე-12 სკოლა შეეჯიბრნენ ერთმანეთს, გამარჯვება მე-12 სკოლამ მოიპოვა. მესამე საპრიზო ადგილს კი მე-4 სკოლა დაეუფლა. სასკოლო ტურნირში ყოველწლიურად თბილისის საჯარო და კერძო სკოლის ასობით მოსწავლე იღებს მონაწილეობას. წელს მონაწილე გუნდების საერთო რაოდენობამ 50-ზე მეტი გუნდი შეადგინა.
ტურნირის მიზანი სპორტულ ცხოვრებაში მოსწავლეთა ჩართულობა, ჯანსაღი ცხოვრების წესის დამკვიდრება და ახალგაზრდებში ფეხბურთის პოპულარიზაციაა. აღმოსავლეთ ევროპის უნივერსიტეტის რექტორმა, დავით ჩერქეზიშვილმა, პირველ ადგილზე გასულ გუნდს ფულადი ჯილდო, მედლები და თასი გადასცა. მეორე და მესამე ადგილზე გასული გუნდის წევრები ფულადი პრიზებითა და ფასიანი საჩუქრებით დაჯილდოვდნენ. ფინალი ქ. თბილისის მერიის საფეხბურთო სპორტული ცენტრის მოედანზე ‘’იმედი’’ გაიმართა. აღნიშნულ მატჩს სპორტისა და ახალგაზრდობის საქმეთა სამინისტროს წარმომადგენელი, გუნდების გულშემატკივრები და EEU-ს სტუდენტები დაესწრნენ.
ტურნირის მხარდამჭერი კომპანიები არიან კარაოკე კლუბი Selftime – Karaoke Club, სალონი „4U“, ლუდის ბარი Beer Garden და კინოთეატრი „ამირანი“. აღნიშნული კომპანიებისგან გუნდებს სპეციალური პრიზები გადაეცათ.