დღეს აღმოსავლეთ ევროპის უნივერსიტეტში წიგნის „საქართველოს ევროპული გზები” პრეზენტაცია გაიმართა. ინგლისურენოვან წიგნში ქართული ეროვნული და კულტურული იდენტობა ევროპასთან ურთიერთობის კონტექსტშია განხილული და ის საქართველოთი დაინტერესებულ უცხოელ მკითხველზეა გათვლილი.
წიგნში სხვადასხვა ავტორის 11 წერილია გამოქვეყნებული, რომლებშიც აღწერილია ქართულ-ევროპული ისტორიული ურთიერთობები, საქართველოს ევროპეიზაცია, ევროპული ლიბერალიზმისა და სოციალ-დემოკრატიის ქართულანალოგები, როგორც სახელმწიფოებრივ, ასევე, ტრადიციული კულტურის დონეზე. ნაჩვენებია ევროპული ესთეტიკური და სახელოვნებო ფორმების ადაპტაცია ქართულ ხელოვნებაში: ფერწერა, თეატრი, კინო, ლიტერატურა და ა.შ.
შეხვედრას სახელმწიფო მინისტრის აპარატის სტრატეგიული კომუნიკაციების დეპარტამენტის ხელმძღვანელი თორნიკე ნოზაძე, წიგნის „საქართველოს ევროპული გზები” რედაქტორი ზურაბ ქარუმიძე, ფილოლოგი ლევან გიგინეიშვილი და ნატოსა და ევროკავშირის შესახებ საინფორმაციო ცენტრის დირექტორის მოადგილე გიორგი ფარეშიშვილი უძღვებოდნენ. პრეზენტაციას აღმოსავლეთ ევროპის უნივერსიტეტის რექტორი დავით ჩერქეზიშვილი და პროპექრტორები თეა იმედაძე და რუსუდან ჩიქოვანი დაესწრნენ.
ღონისძიებაზე წამახალისებელი ვიქტორინა გაიმართა. სტუმრების მიერ დასმულ კითხვებზე სწორი პასუხის ავტორებმა საჩუქრად წიგნები მიიღეს.