II საერთაშორისო სამეცნიერო კონფერენცია „კოლონიური და პოსტკოლონიური მემკვიდრეობა: წარსული, აწმყო და მომავალი“

საერთაშორისო სამეცნიერო კონფერენცია „კოლონიური და პოსტკოლონიური მემკვიდრეობა: წარსული, აწმყო და მომავალი“ მიზნად ისახავს ისეთი პლატფორმის შექმნას, რომლის ფარგლებშიც პოსტკოლონიური თემატიკით დაინტერესებული მკვლევრები საკუთარი პოზიციების გამოხატვას, იდეებისა და მიგნებების ურთიერთგაცვლასა და პროდუქტიული დისკუსიების წარმართვას შეძლებენ. კონფერენციის მიზანია, ასევე, ხელი შეუწყოს დიალოგს განსხვავებული დისციპლინების წარმომადგენლებს შორის. შესაბამისად, კონფერენციაზე, შესაძლოა, წარმოდგენილი იქნეს მოხსენებები, რომლებიც განსხვავებული დარგების – ფილოლოგიის, ფილოსოფიის, კულტურის კვლევების, არქიტექტურის, მუსიკის, კინომცოდნეობის და ა.შ. – ჭრილში აანალიზებენ პოსტკოლონიურ პრობლემატიკას. კონფერენციის ორგანიზატორები იმედოვნებენ, რომ განსხვავებული დისციპლინების წარმომადგენელთა შორის აზრების გაცვლა ხელს შეუწყობს პოსტკოლონიური კვლევების განვითარებას საქართველოში და ზოგადად, კავკასიის რეგიონში.

საქართველო პოსტკოლონიური ქვეყანაა და დამოუკიდებლობის აღდგენის შემდეგ საქართველო თანდათან ჩაერთო გლობალურ ეკონომიკურ, კულტურულ, ციფრულ, პოლიტიკურ და ა.შ. ნაკადებში. დაიწყო კოლონიური და საბჭოთა წარსულის რეინტერპრეტაციის დინამიკური პროცესი. თუმცა, პოსტსაბჭოთა პერიოდი ნამდვილად არ აღმოჩნდა ადვილი. ამ ფონზე ინტერდისციპლინური პოსტკოლონიური კვლევები განსაკუთრებულ მნიშვნელობას იძენს. რაში გამოიხატება საქართველოს პოსტკოლონიური მემკვიდრეობა? კულტურის რომელ სფეროებზე შეგვიძლია ვისაუბროთ პოსტკოლონიურ ჭრილში? შეგვიძლია თუ არა თანამედროვე პოსტკოლონიური კვლევების მოდელებითა და მიდგომებით ჩვენი წარსული თუ ახლანდელი გამოცდილების ახსნა? რა ტენდენციები შეიძლება გამოვყოთ კოლონიური/საბჭოთა მემკვიდრეობის რეინტერპრეტაციის პროცესებში? როგორ წარმოგვიდგენია ჩვენი განვითარება: კოლონიური/საბჭოთა მემკვიდრეობის რეინტერპრეტაციის, მისი უარყოფის, თუ მიღების გზით? ბოლო დროს განვითარებული მოვლენების ფონზე განსაკუთრებული სიმწვავით იჩენს თავს შემდეგი შეკითხვები: რა როლი ენიჭება ინტელექტუალს პოსტკოლონიური მემკვიდრეობის გააზრების პროცესში? რა სახის მორალური პასუხისმგებლობა ეკისრება მას ამ დროს? როგორ შეიძლება გააქტიურებულ იმპერიალისტურ დისკურსებთან დაპირისპირება და მათი გადალახვა?

კონფერენციაში მონაწილეობა უფასოა.

კონფერენციაზე რეგისტრაციისთვის კონფერენციაში მონაწილეობის მსურველებმა უნდა გამოაგზავნონ თავიანთი მოხსენების აბსტრაქტები შემდეგ მისამართზე: g.tavadze@eeu.edu.ge და არეში „თემა“ (Subject) მიუთითოს მომხსენებლის სახელი და გვარი.

აბსტრაქტს აუცილებლად თან უნდა ერთვოდეს შემდეგი ინფორმაცია:

• მომხსენებლის სახელი და გვარი
• მომხსენებლის აკადემიური სტატუსი და სამეცნიერო ხარისხი
• უნივერსიტეტისა და ფაკულტეტის/კვლევითი ცენტრის დასახელება
• მოხსენების სათაური
• პირადი ვებ-გვერდის მისამართი (ინსტიტუციის ვებ-გვერდზე)
• საკონტაქტო ინფორმაცია: ელ. ფოსტა და ტელეფონი

მოხსენების აბსტრაქტი უნდა გამოიგზავნოს Ms Word ფორმატში ქართულ და ინგლისურ ენებზე  (ფონტი – sylfaen, შრიფტის ზომა – 12, სტრიქონებს შორის ინტერვალი – 1,15). სიტყვების რაოდენობა: დაახლ. 300.

• კონფერენციაზე წარმოდგენილი მოხსენება არ უნდა იყოს გამოქვეყნებული სამეცნიერო პუბლიკაციის სახით.
• მოხსენებების აბსტრაქტების მიღების ბოლო ვადაა 2023 წლის 31 ივლისი.
• ინფორმაციას მიღებული აბსტრაქტების შესახებ კონფერენციაზე მონაწილეობის მსურველები მიიღებენ 2023 წლის 5 აგვისტომდე.
• დეტალური პროგრამა კონფერენციის მონაწილეებს 1 თვით ადრე გაეგზავნებათ მათ მიერ მითითებულ ელექტრონული ფოსტის მისამართზე.
• კონფერენციაზე წარმოდგენილი მოხსენებები 2024 წელს გამოქვეყნდება სამეცნიერო სერიაში „ინტერდისციპლინური პოსტკოლონიური კვლევები“, ტ. 2, თბილისი: აღმოსავლეთ ევროპის უნივერსიტეტი.

პროფ. გიორგი თავაძე (აღმოსავლეთ ევროპის უნივერსიტეტი)

პროფ. ანატოლი ოლექსიენკო (ჰონგ-კონგის განათლების უნივერსიტეტი)

ასოც. პროფ. თამარ ჩოკორაია (კავკასიის უნივერსიტეტი)

ასოც. პროფ. ირაკლი ჩხაიძე (ივ. ჯავახიშვილის თბილისის სახელმწიფო უნივერსიტეტი)

გიორგი არქანია (უახლესი ისტორიის ცენტრი)

ნიკოლოზ სარაჯიშვილი (უახლესი ისტორიის ცენტრი)