აღმოსავლეთ ევროპის უნივერსიტეტის (EEU) განათლების მეცნიერებების ფაკულტეტზე, განათლების საერთაშორისო დღის ფარგლებში, მიმდინარე წლის 25 იანვარს გაიმართა განათლების კურსდამთავრებულთა, სტუდენტთა და დამსაქმებელთა ყოველწლიური ერთობლივი რიგით მეორე კონფერენცია – პროფესიული განვითარების დღე 2025.
კონფერენციის მიზანს წარმოადგენდა კურსდამთავრებულთა, დამსაქმებელთა და სტუდენტთა პრაქტიკული და კვლევითი გამოცდილების ურთიერთგაზიარება, სამეცნიერო საქმიანობაში ერთობლივი ჩართულობის სტიმულირება, განათლების სფეროში არსებული ძირითადი პრობლემატიკის იდენტიფიცირება, მათი გადაჭრის ინოვაციური გზების ძიება და პროფესიული განვითარების ხელშეწყობა. ამასთანავე, კონფერენცია ეძღვნებოდა განათლების საერთაშორისო დღეს.
ღონისძიება გახსნა აღმოსავლეთ ევროპის უნივერსიტეტის რექტორმა, პროფესორმა კახაბერ ლაზარაშვილმა. მონაწილეებს მიესალმნენ EEU-ს განათლების მეცნიერებების ფაკულტეტის დეკანი, ასოცირებული პროფესორი ქეთევან აფთარაშვილი და სამეცნიერო კვლევებისა და განვითარების დეპარტამენტის უფროსი, პროფესორი დავით სიხარულიძე.
კონფერენციაზე მთავარი მომხსენებელი იყო მიდლსექსის უნივერსიტეტის (დიდი ბრიტანეთი) სკოლამდელი განათლების დეპარტამენტის პროფესორი, აღმოსავლეთ ევროპის უნივერსიტეტის სკოლამდელი განათლების პროგრამის ხელმძღვანელი ანჯელა სქოლანი.
ღონისძიების ფარგლებში გაიმართა დამსაქმებელთა ფორუმი, რომელშიც მონაწილეობა მიიღეს EEU-ს პარტნიორმა საგანმანათლებლო დაწესებულებებმა:
- ქ. თბილისის მე-11 საჯარო სკოლა – დირექტორი: ნინო ჯაბანიშვილი, მოხსენების თემა: „განათლების ხარისხის მართვა ზოგადსაგანმანათლებლო დაწესებულებებში’’;
- თბილისის 172 საჯარო სკოლა – თამუნა ზურაბაშვილი, მოხსენების თემა: „მეტი ვიდრე ქულა: ინოვაციური მიდგომები შეფასებაში’’;
- სკოლა ,,ქორალი’’ – ანა კინწურაშვილი, მოხსენების თემა: „არაფორმალური განათლების როლი სასკოლო საზოგადოებაში’’;
- ქ. თბილისის 114 საჯარო სკოლა;
- ამერიკული საერთაშორისო სკოლა ,,პროგრესი’’.
ღონისძიების ფარგლებში, აღმოსავლეთ ევროპის უნივერსიტეტსა და ამერიკულ საერთაშორისო სკოლა “პროგრესს” შორის ურთიერთთანამშრომლობის მემორანდუმი გაფორმდა. მემორანდუმის თანახმად, მხარეებს შესაძლებლობა ეძლევათ, საერთო ინტერესებიდან გამომდინარე, განახორციელონ პედაგოგიური და ადმინისტრაციული პრაქტიკის, განათლების კვლევების, ერთობლივი ღონისძიებების დაგეგმვა და ორგანიზება.
