19 მარტს აღმოსავლეთ ევროპის უნივერსიტეტის ახალ კამპუსში გაიმართა დისკუსია თემაზე: ,,სასწავლო მიგრაციის როლი კარიერის განვითარებაში’’.
აღნიშნულ ღონისძიებას ესწრებოდნენ კერძო სკოლა „ლეტერატოს“ მოსწავლეები და ხელმძღვანელი – თამარ რაზმაძე, EEU-ს სტუდენტები და პერსონალი.
ღონისძიება გახსნა აღმოსავლეთ ევროპის უნივერსიტეტის რექტორმა კახაბერ ლაზარაშვილმა, რომელიც მიესალმა სტუმრებს და გააცნო დღის მანძილზე დაგეგმილი აქტივობები.
ღონისძიების პირველ ეტაპზე სკოლის მოსწავლეებმა და სხვა მოწვეულმა სტუმრებმა დაათვალიერეს აღმოსავლეთ ევროპის უნივერსიტეტის ახალი თანამედროვე ინფრასტრუქტურით აღჭურვილი კამპუსი, ასევე ჯანდაცვის მეცნიერებათა ფაკულტეტის დეკანის მოადგილემ, ელენე ზურაბიშვილმა წარადგინა ანატომიური მაგიდის პრეზენტაცია. სკოლა ,,ლეტერატოს’’ მოსწავლეები ეწვივნენ EEU-ს სიმულაციურ ცენტრს, სადაც კლინიკური და პროფესიული უნარების პედაგოგის, გიორგი ჩილინგარაშვილის დახმარებით მულაჟებსა და მანეკენებზე სხვადასხვა კლინიკური მანიპულაციები ჩაატარეს.
გაიმართა იმიტირებული სასამართლო პროცესი უნივერსიტეტის იმიტირებული სასამართლო პროცესების დარბაზში. ღონისძიების პირველი ეტაპის დასასრულს კი EEU-ს ბიბლიოთეკაში ჩატარდა შემეცნებით-გასართობი თამაში – „საუბრები ეკონომიკაზე“, რომელსაც ბიზნესისა და ინჟინერიის ფაკულტეტის დეკანი, ვასილ კიკუტაძე უძღვებოდა.
ღონისძიების მეორე ეტაპი სრულად დაეთმო დისკუსიას, რომელსაც უძღვებოდა მოდერატორი: ირმა წერეთელი – გერმანიის საერთაშორისო თანამშრომლობის საზოგადოების პროგრამის კოორდინატორი.
