მიმდინარე წლის 26-29 სექტემბერს აღმოსავლეთ ევროპის უნივერსიტეტი მონაწილეობდა საერთაშორისო განათლების ევროპის ასოციაციის (EAIE 2023) ყოველწლიურ გამოფენასა და კონფერენციაში, რომელიც ქალაქ როტერდამში, ნიდერლანდებში გაიმართა.
აღმოსავლეთ ევროპის უნივერსიტეტის ინიციატივითა და ორგანიზებით EAIE 2023-ზე წარმოდგენილი იყო საქართველოს სტენდი, რომელიც 11 ქართულ უნივერსიტეტს აერთიანებდა. ეს იყო პირველი შემთხვევა, როდესაც უნივერსიტეტებმა დამოუკიდებლად, საკუთარი ძალისხმევით წარმოადგინეს ქვეყანა მსგავსი მასშტაბის საგანმანათლებლო გამოფენაზე.
EAIE 2023 სიდიდით პირველი საგანმანათლებლო ღონისძიებაა ევროპაში, რომელშიც მონაწილეობას იღებენ უნივერსიტეტები მსოფლიოს ყველა ქვეყნიდან. ის საუკეთესო პლატფორმაა პარტნიორული ქსელის გაფართოებისა და უნივერსიტეტის ინტერნაციონალიზაციისთვის.
აღმოსავლეთ ევროპის უნივერსიტეტის სახელით გამოფენაში მონაწილეობა მიიღეს უნივერსიტეტის ვიცე-რექტორმა საერთაშორისო და ადმინისტრაციულ საკითხებში, თეა იმედაძემ და ჯანდაცვის მეცნიერებათა ფაკულტეტის დეკანის მოადგილემ, ელენე ზურაბიშვილმა.
EEU-ს წარმომადგენლებმა გამოფენის მონაწილეებს გააცნეს უნივერსიტეტის საგანმანათლებლო პროგრამები, უპირატესობები და შეთავაზებები. გამართეს შეხვედრები ევროპის ქვეყნების სხვადასხვა უნივერსიტეტების წარმომადგენლებთან. შეხვედრების შედეგად გამოიკვეთა უნივერსიტეტის პარტნიორული ქსელის გაფართოებისა და ახალი თანამშრომლობის დამყარების შესაძლებლობები. ესპანეთის, პოლონეთის, ნიდერლანდებისა და პორტუგალიის უნივერსიტეტებთან დაისახა ინსტიტუციური პარტნიორობისა და ERASMUS+-ის ფარგლებში თანამშრომლობის გეგმები.
ნიდერლანდებში ვიზიტის ფარგლებში, აღმოსავლეთ ევროპის უნივერსიტეტის ვიცე-რექტორი, თეა იმედაძე, შეხვდა ნიდერლანდების სამეფოში საქართველოს საგანგებო და სრულუფლებიან ელჩს, ბატონ დავით სოლომონიას. შეხვედრაზე ქალბატონმა თეა იმედაძემ ელჩს გააცნო ინფორმაცია გამოფენისა და საქართველოს წარმომადგენლობის შესახებ. მხარეებმა ისაუბრეს ნიდერლანდების უნივერსიტეტებთან თანამშრომლობის პერსპექტივებსა და მათთან თანამშრომლობის განვითარების შესაძლებლობებზე.
EAIE 2023-ში მონაწილეობა აღმოსავლეთ ევროპის უნივერსიტეტის ინეტრნაციონალიზაციის განვითარებისა და მისი სტუდენტებისა და პერსონალისთვის ახალ შესაძლებლობების შექმნის საწინდარია. ამასთანავე, იგი უზრუნველყოფს საქართველოს გამოჩენას საერთაშორისო განათლების ასპარეზზე და უხსნის კარს უმაღლესი განათლების სფეროში გლობალური თანამშრომლობის გაღრმავების მრავალ შესაძლებლობას.
დამატებითი ინფორმაცია საერთაშორისო განათლების ევროპის ასოციაციის შესახებ იხილეთ ბმულზე: https://www.eaie.org/