იმანუელ კანტი – 300
იმანუელ კანტის დაბადების 300 წლისთავისადმი მიძღვნილი სამეცნიერო კონფერენცია
29-30 ნოემბერი, 2024 წელი
აღმოსავლეთ ევროპის უნივერსიტეტი – სულხან-საბა ორბელიანის უნივერსიტეტი
იმანუელ კანტი (1724-1804) კაცობრიობის უდიდეს მოაზროვნეთა რიცხვს განეკუთვნება. მისმა ნაშრომებმა დიდწილად განსაზღვრა ევროპული ფილოსოფიის შემდგომი განვითარება, ხოლო მისი შეხედულებები დღესაც აქტუალურია მეცნიერების სხვადასხვა სფეროში. ქართულ სინამდვილეში კანტის რეცეფციას ნაყოფიერი ისტორია აქვს: ქართველი მოაზროვნეები (სოლომონ დოდაშვილი, დადაშ გელოვანი, შალვა ნუცუბიძე, სერგი დანელია, გურამ თევზაძე და სხვ.) სათანადო ყურადღებას უთმობდნენ გერმანელი ფილოსოფოსის ნააზრევის შესწავლას. გარდა ამისა, ქართულადაა თარგმნილი კანტის მთელი რიგი ნაშრომები („წმინდა გონების კრიტიკა“, „პრაქტიკული გონების კრიტიკა“, „ზნეობის მეტაფიზიკის დაფუძნება“, „რა არის განმანათლებლობა“, „რელიგია მხოლოდ გონების საზღვრებში“, „მარადიული მშვიდობისკენ“).
წინამდებარე კონფერენცია, რომელიც კანტის დაბადების 300 წლისთავს ეძღვნება, მიზნად ისახავს გერმანელი ფილოსოფოსის შემოქმედების ანალიზს საერთაშორისო ურთიერთობების ფილოსოფიის, პოლიტიკისა და სამართლის ფილოსოფიის ჭრილში. კონფერენციის ფარგლებში ყურადღება გამახვილდება თანამედროვეობისათვის კანტის ნააზრევის სხვადასხვა ასპექტის რელევანტურობაზე. კონფერენციის ორგანიზატორებია ვარლამ ჩერქეზიშვილის სახ. ინტერდისციპლინური კვლევების ცენტრი (აღმოსავლეთ ევროპის უნივერსიტეტი) და დავით ბატონიშვილის სამართლის ინსტიტუტი (სულხან-საბა ორბელიანის უნივერსიტეტი).
კონფერენცია გაიმართება 29-30 ნოემბერს. 29 ნოემბერს კონფერენციის სხდომა ჩატარდება აღმოსავლეთ ევროპის უნივერსიტეტში (ი. ენუქიძის 6), ხოლო 30 ნოემბერს – სულხან-საბა ორბელიანის უნივერსიტეტში (კ. ქუთათელაძის ქ. 3). კონფერენციის ორივე დღის ბოლოს გაიმართება შემაჯამებელი პანელური სხდომა.
კონფერენციის საორგანიზაციო კომიტეტი: პროფ. გიორგი თავაძე, პროფ. დიმიტრი გეგენავა, პროფ. ზვიად როგავა, პროფ. ვაჟა ვარდიძე
მოხსენებების ხანგრძლივობა: 20-25 წუთი + დისკუსია (15-20 წუთი)
საკვანძო თარიღები:
- აბსტრაქტების მიღების პერიოდი: 2024 წლის 20 ოქტომბრამდე;
- გადაწყვეტილება აბსტრაქტების მიღების შესახებ: 2024 წლის 25 ოქტომბერი.
აბსტრაქტები (200-250 სიტყვა, Sylfaen, ინტერვალი 1,5) გამოგზავნილი უნდა იქნეს შემდეგ მისამართებზე:
interdisciplinary@eeu.edu.ge
princedavid@sabauni.edu.ge