სამუშაო ჯგუფი: თამარ ჩოკორაია, ევა გჟეუნდა, გიორგი თავაძე,.
პროექტის აღწერა: წარმოსახვითი გეოგრაფიები მოიცავს მოცემულ დისკურსში არსებულ ინფორმაციას ამა თუ იმ ადგილის/რეგიონის/ქვეყნის/ხალხის შესახებ. ის შეიძლება მოცემული იყოს მოგზაურობის ჩანაწერების, მხატვრული ნაწარმოებების, მემუარების, ფოტოალბომების, ვიდეოფილმების და ა.შ. სახით. ჯერ კიდევ X საუკუნეში ქართველ სასულიერო მოღვაწეს, ათონის ივერთა მონასტრის წინამძღვარ იოანე მთაწმინდელს სურდა ესპანეთში გამგზავრება, რადგან იქ, მის ხელთ არსებული ინფორმაციით, „ქართველთა ნათესავები“ ცხოვრობდნენ. საუკუნეების შემდეგ ევროპიდან საქართველოში კათოლიციზმის საქადაგებლად ჩამოსულმა მისიონერებმა საქართველოს შესახებ თავიანთი წარმოსახვითი გეოგრაფიები შექმნეს და ისინი თავიანთ ანგარიშებში თუ ჩანაწერებში ასახეს. XIX საუკუნეში, „ორიენტალისტური“ კვლევების განვითარების ფონზე საქართველო და ზოგადად, კავკასიის რეგიონი, ხშირად განიხილებოდა ეგზოტიკურ ადგილად. საქართველოს და ზოგადად, კავკასიის რეგიონის შესახებ საკუთარი წარმოსახვითი გეოგრაფია არსებობდა რუსეთშიც, რომელიც საქართველოს/კავკასიას იმპერიის ნაწილად განიხილავდა. წარმოსახვითი გეოგრაფიების შექმნის პროცესი არც საბჭოთა დროს შეწყვეტილა, რაზეც საბჭოთა პერიოდში გამოქვეყნებული ჟურნალისტური მოგზაურობის რეპორტაჟებიც მეტყველებს. ბუნებრივია, ეს პროცესი გრძელდება დღესაც. პროექტის მიზანია, ინტერდისციპლინურ ჭრილში გამოიკვლიოს წარმოსახვითი გეოგრაფიების შექმნის იდეოლოგიურ-კულტურული ასპექტები, გააანალიზოს დისკურსულ ველში არსებული დომინანტური ნარატივები და მათი ფუნქციონირების მექანიზმები. პროექტის ფარგლებში დაგეგმილია სამუშაო ჯგუფების შეხვედრების, საჯარო ლექციების, ადგილობრივი და საერთაშორისო კონფერენციების ორგანიზება და სამეცნიერო კრებულის გამოცემა.