აღმოსავლეთ ევროპის უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის ორგანიზებით 2021 წლის 29-30 ოქტომბერს გაიმართა ონლაინ საერთაშორისო კონფერენცია: ,,უნივერსიტეტების დანიშნულება და ინსტიტუციონალური ავტონომია: გამოწვევები და მათი გავლენა საქართველოზე“.
ღონისძიება აღმოსავლეთ ევროპის უნივერსიტეტის ვიცე-რექტორმა სამეცნიერო დარგში შალვა მაჭავარიანმა გახსნა. კონფერენციის მონაწილეებს დავით ჩერქეზიშვილი, ივანე ჯავახიშვილის სახელობის თბილისის სახელმწიფო უნივერსიტეტის რექტორმა გიორგი შარვაშიძე, საქართველოს განათლებისა და მეცნიერების მინისტრის მოადგილე ნუნუ მიცკევიჩი და სსიპ განათლების ხარისხის განვითარების ეროვნული ცენტრის დირექტორი თამარ მახარაშვილი მიესალმნენ.
კონფერენციის გახსნის შემდეგ, აღმოსავლეთ ევროპის უნივერსიტეტის რექტორმა დავით ჩერქეზიშვილმა ლონდონის საუნივერსიტეტო კოლეჯის ემერიტუს პროფესორ რონალდ ბარნეტს საპატიო დოქტორის ხარისხი მიანიჭა და აღნიშნა, რომ მისი აკადემიური აქტივობა, არსებული თანამშრომლობა და მხარდაჭერა საკმაოდ მნიშვნელოვანია უნივერსიტეტის განვითარებისთვის.
კონფერენციას უძღვებოდნენ მოდერატორები:
- გიორგი თავაძე, აღმოსავლეთ ევროპის უნივერსიტეტის ინტერდისციპლინური კვლევების ცენტრის ხელმძღვანელი;
- ირმა გრძელიძე, თბილისის სახელმწიფო უნივერსიტეტის ხარისხის უზრუნველყოფის სამსახურის უფროსი.
კონფერენციაზე ძირითადი მოხსენებებით წარდგნენ:
- ემერიტუსი პროფესორი რონალდ ბარნეტი, ლონდონის საუნივერსიტეტო კოლეჯი; მოხსენება: ,,მხოლოდ კავშირი: უნივერსიტეტის მომავლის შექმნა“;
- პროფესორი პეტერ მაასენი, ოსლოს უნივერსიტეტი; მოხსენება: ,,უმაღლესი განათლების მართვა და ინსტიტუციური ავტონომია: აკადემიური, ეკონომიკური, ორგანიზაციული, სოციალურ–კულტურული და პოლიტიკური მიზნებისა და სინამდვილის ბალანსი“.
კონფერენციაზე ჰონგ-კონგის, გაზიანტეპის, სორბონის, აზერბაიჯანის, რივნეს, გრინვიჩის, ლონდონის, ალიკანტეს, ოსლოს, მანჩესტერის, ნიქოზიისა და მიდლსექსის უნივერსიტეტების განათლების ექსპერტებსა და სპეციალისტებთან ერთად მოხსენებები ქართველმა განათლების მკვლევარებმა წარმოადგინეს.
კონფერენციას, ასევე, ესწრებოდნენ საქართველოს უმაღლესი საგანმანათლებლო დაწესებულებების აკადემიური პერსონალი, სტუდენტები და დარგის სხვა სპეციალისტები.
კონფერენცია კითხვა-პასუხის რეჟიმში წარიმართა და მონაწილეებმა განიხილეს საერთაშორისო გამოცდილების ჭრილში საქართველოს უმაღლესი განათლების ის პრობლემები, რომლებიც პირდაპირ კავშირშია ქვეყნის სოციალურ, კულტურულ, ეკონომიკურ და პოლიტიკურ განვითარებასთან.
კონფერენციის დღის წესრიგი და სხვა დეტალები იხ. კონფერენციის ვებგვერდზე: https://conference.edu.ge/
