მიმდინარე წლის 6 დეკემბერს IFES-ისა (International Foundation for Electoral Systems) და სამოქალაქო განათლების ლექტორთა ასოციაციის (CELA) ორგანიზებით გაიმართა შეხვედრა, რომელსაც ესწრებოდნენ აღმოსავლეთ ევროპის უნივერსიტეტის, ბრიტანული სასწავლო უნივერსიტეტი საქართველოში და მართვისა და კომუნიკაციის საერთაშორისო სასწავლო უნივერსიტეტი ალტერბრიჯის წარმომადგენლები.
აღმოსავლეთ ევროპის უნივერსიტეტს, IFES-სა და CELA-ს შორის ურთიერთთანამშრომლობის მემორანდუმი გაფორმდა. მემორანდუმს ხელი მოაწერეს, აღმოსავლეთ ევროპის უნივერსიტეტის რექტორის მოვალეობის შემსრულებელმა, კახაბერ ლაზარაშვილმა, IFES-ის წარმომადგენლობის ხელმძღვანელმა საქართველოში, ქეთევან მაისურაძემ და CELA-ს აღმასრულებელმა დირექტორმა, თამარ ქარაიამ.
ურთიერთთანამშრომლობის მემორანდუმი ითვალისწინებს აკადემიური და სამეცნიერო თანამშრომლობის გაღრმავებასა და ხელშეწყობას. კერძოდ, ხელმოწერილი მემორანდუმის საფუძველზე აღმოსავლეთ ევროპის უნივერსიტეტი IFES-ის მიერ შემუშავებულ სამოქალაქო განათლების საუნივერსიტეტო ერთსემესტრიან კურსს – „დემოკრატია და მოქალაქეობა” – ჩართავს თავის სასწავლო კურიკულუმში.
მემორანდუმის გაფორმებისას პარტნიორებმა განიხილეს სამომავლო გეგმები და ერთობლივი პროექტების განხორციელების იდეები, რომელიც გამოცდილების გაზიარების შესაძლებლობებს იძლევა. ასევე, შეხვედრაზე ხაზგასმული იყო სტუდენტების სამოქალაქო განათლებისა და პასუხისმგებლობის ამაღლების მნიშვნელობა, ის ღონისძიებები, რომელიც აღნიშნულ პროცესს შეუწყობს ხელს.
აღნიშნული მემორანდუმი ნაყოფიერი თანამშრომლობის საწინდარია აღმოსავლეთ ევროპის უნივერსიტეტის სტუდენტებისა და პერსონალისთვის.
