აღმოსავლეთ ევროპის უნივერსიტეტის სადოქტორო და უმაღლესი განათლების კვლევების განვითარების ცენტრისა და უწყვეტი განათლების ორგანიზებით 2022 წლის 23 ივნისს გაიმართა მორიგი სემინარი თემაზე: „საერთო ენის განვითარება: აკადემიური პერსონალი – ადმინისტრაციული პერსონალი – სტუდენტები“.
შეხვედრაზე მომხსენებლები იყვნენ:
- ემერიტუსი პროფესორი დევიდ გრინვუდი (კორნელის უნივერსიტეტი, აშშ); მოხსენება: „ტეილორიზმი“, მატრიცული ორგანიზაცია და ტრანსდისციპლინურობა უმაღლეს განათლებაში“
- ასოცირებული პროფესორი სიორენ ბენგტსენი (აარჰუსის უნივერსიტეტი, დანია). მოხსენება: „უნივერსიტეტის სტაბილიზება და დესტაბილიზება“.
სემინარზე დევიდ გრინვუდმა და სიორენ ბენგტსენმა ისაურბეს ისეთ საკითხებზე, როგორიცაა:
- რა როლს ასრულებს აკადემიური პერსონალი თანამედროვე ნეოლიბერალურ გარემოში?
- რა ღირებულებებს ემყარება თანამედროვე აკადემიური სივრცე? ადმინისტრაციული გარემო? სტუდენტები პარტნიორებად უნდა მივიჩნიოთ, თუ მომხმარებლებად?
- რატომ არის იმის საჭიროება, რომ ვიმუშაოთ საერთო ენის განვითარებაზე და როგორ უნდა მოხდეს ეს?
სემინარს ესწრებოდნენ აღმოსავლეთ ევროპის უნივერსიტეტისა და საქართველოს სხვადასვა უნივერსიტეტების პროფესორ-მასწავლებლები, EEU-ს ადმინისტრაციული პერსონალი და სტუდენტები. მოხსენებების შემდეგ გაიმართა საინტერესო და აქტიური დისკუსია.
უმაღლესი განათლების მუდმივმოქმედი სემინარი მეორედ ჩატარდა და მისი მიზანია ისეთი სივრცის შექმნა, რომლის ფარგლებშიც განსხვავებული დისციპლინების წარმომადგენლები შეძლებენ, ერთმანეთს გაუზიარონ უმაღლესი განათლების შესახებ საკუთარი პერსპექტივები და ხედვები. ის, ასევე, მიზნად ისახავს, ხელი შეუწყოს უმაღლესი განათლების ქართულ სივრცეში ინოვაციური იდეების, საუკეთესო პედაგოგიური პრაქტიკისა და მიდგომების გავრცელებას. მუდმივმოქმედი სემინარის ხელმძღვანელია აღმოსავლეთ ევროპის უნივერსიტეტის პროფესორი პოლ გიბსი.
