რესურსები

სიმულაციური ლაბორატორია აღჭურვილია სხვადასხვა ტიპის და ფუნქციური დატვირთვის მქონე თანამედროვე სასწავლო მულაჟებით/მანეკენებით, მოდელებით, პაციენტის გამოკვლევისა და სხვადასხვა კლინიკური მანიპულაციების ჩატარებისთვის საჭირო მასალითა და სამედიცინო იარაღებით. დიპლომირებული მედიკოსის საგანმანათლებლო პროგრამის სტუდენტები კლინიკური უნარ-ჩვევების სწავლას სიმულაციურ ლაბორატორიაში პროგრამაზე სწავლის  პირველივე სემესტრიდან იწყებენ.

ანატომიის კაბინეტი აღჭურვილია უმაღლესი ხარისხის, თანამედროვე, მაღალტექნოლოგიური ,,ინტერაქტიული ანატომიური მაგიდით“, რომელიც საშუალებას იძლევა ადამიანის სხეულის რეალურ ზომებში, 3D ფორმატით მოხდეს ორგანიზმის 11 სისტემის სწავლება (ანატომიური, ჰისტოლოგიური, პათოლოგიური და რადიოლოგიური მიმართულებებით).  მაგიდას შეუძლია არა მხოლოდ სტატიკური, არამედ მოძრავი გამოსახულებების შექმნაც, მაგალითად იგი აღჭურვილია გულის ანიმაციური მოდელით, რაც ახდენს გულისცემის ბუნებრივ სიმულაციას და იძლევა „მფეთქავი“ გულის სხვადასხვა  ჭრილში ნახვის საშუალებას. ასევე, მაგიდას გააჩნია გვამების კვეთის სიმულაციის უნარი და იძლევა სტუდენტების ცოდნის შემოწმების საშუალებას პროგრამაში ჩატვირთული სხვადასხვა ტიპის კითხვების და ქვიზების საშუალებით და სხვა.

კლინიკური და პრაქტიკული უნარ-ჩვევების განვითარების ცენტრის შემადგენლობაში შემავალი ქიმიისა და ბიოქიმიის, მიკრობიოლოგიის, ჰისტოლოგიისა და უჯრედული ბიოლოგიის ლაბორატორიები აღჭურვილია მაღალი ხარისხის შესაბამისი ლაბორატორიული ავეჯით, ჭურჭლით, მასალებით, კულტურებით, რეაქტივებით, სხვადასხვა ტიპის დანადგარებით, ანალიზატორებით, მიკროსკოპებით, გამწოვი კარადებით, ლამინარებით და ა.შ.. აღნიშნულ ლაბორატორიებში ყველა პირობაა შექმნილი სტუდენტებისთვის  ლაბორატორიული მეცადინეობების სრულყოფილად და საფუძლიანად წარმართვისა და სამეცნიერო კვლევების განხორციელებისათვის.

ობიექტურად სტრუქტურირებული კლინიკური გამოცდის (OSCE) სადგურებზე ხდება დიპლომირებული მედიკოსის საგანმათლებლო პროგრამით განსაზღვრული კლინიკური და პროფესიული უნარების სასწავლო კურსების სწავლის შედეგების შეფასება სწავლების პირველივე სემესტრიდან. OSCE-ის სადგურებზე მოწმდება   სტუდენტების სხვადასხვა კლინიკური, კომუნიკაციური, კოგნიტური, აფექტური და ა.შ. უნარები მანეკენების, მულაჟებისა და სტანდარტიზირებული პაციენტების გამოყენებით.