სასწავლო პროგრამა-კონკურსი: „სარეკრეაციო სივრცის მოწყობა ახალი კამპუსის ეზოში“

კონკურსის ფარგლებში აღმოსავლეთ ევროპის უნივერსიტეტის ახალი კამპუსის ტერიტორიაზე, ქ. თბილისში, ენუქიძის ქ. 6 (დავით აღმაშენებლის ხეივანი, აშშ საელჩოს მიმდებარედ), სარეკრეაციო სივრცის მოწყობისთვის დამუშავდება არქიტექტურული ესკიზები.

• პროგრამა-კონკურსში მონაწილეობის უფლება აქვს აღმოსავლეთ ევროპის უნივერსიტეტის არქიტექტურის დარგის სტუდენტებს როგორც ინდივიდუალურად, ასევე ჯგუფურად;
• ჯგუფების შემადგენლობა არ უნდა აღემატებოდეს 4 მონაწილეს;
• ჯგუფები შესაძლებელია დაკომპლექტდეს სხვადასხვა სემესტრის/კურსის სტუდენტებით;

• სარეკრეაციო სივრცე უნდა დაპროექტდეს სასწავლო კორპუსის უკან, გეგმარებით დავალებაში მითითებულ (იხ. გენერალური გეგმა) თავისუფალ ნაკვეთზე ( 1435 კვ.მ);
• კონკურსზე წარმოსადგენი ყველა მასალა შესრულებული უნდა იყოს გეგმარებით დავალებაში მითითებული პარამეტრების დაცვით და სივრცითი ორგანიზაციის მოთხოვნების გათვალისწინებით;
• არქიტექტურული ესკიზები წარმოდგენილ უნდა იქნას გეგმარებით დავალებაში მითითებულ მასშტაბებში და კომპოზიციურ ფორმატში;
• წარმოსადგენი მასალის გრაფიკული შესრულებისთვის და ესკიზების ელექტრონულად წარმოდგენისთვის სტუდენტებმა უნდა გამოიყენონ მითითებული პროგრამები.

სტუდენტებს არ მოეთხოვებათ არქიტექტურული პროექტის სრულად დამუშავება. კონკურსის პირობით განსაზღვრულია მხოლოდ პრინციპიალური ესკიზების შექმნა.

ნამუშევრების შეფასებისას მთავარი აქცენტი გაკეთდება იდეის რეალურობაზე. მნიშვნელოვანი ყურადღება, აგრეთვე, მიექცევა გადმოცემის მხატვრულ-ესთეტურ მხარეს.

მონაწილეების მიერ შესრულებული ესკიზები უნდა მიესადაგებოდეს კამპუსის საერთო არქიტექტურულ სტილისტიკას და ხელს უწყობდეს ფსიქო-ფიზიოლოგიური კომფორტის შექმნას სტუდენტების, აკადემიური პერსონალის და ვიზიტორებისთვის.

დასაპროექტებელი ობიექტისთვის შერჩეული მასალა, საერთო კომპოზიციური სქემა, არქიტექტურულ-მხატვრული იერსახე მიზანშეწონილია იყოს მაქსიმალურად იოლად აღსაქმელი. სარეკრეაციო სივრცე ტექნოლოგიურად არ უნდა წარმოადგენდეს რთულად ასაგებ/დასამონტაჟებელ ობიექტს.

კონკურსის სამუშაო ენა არის ქართული. ესკიზებში გამოყენებული ყველა დასახელება და ტერმინი წარმოდგენილი უნდა იყოს ქართულად.

• წინასწარი რეგისტრაცია – 2022 წლის 6 მაისი – 12 მაისი;

(სასწავლო პროგრამა-კონკურსში მონაწილეობის მსურველებმა ინდივიდუალურად ან ჯგუფურად უნდა შეავსოს სარეგისტრაციო ფორმა: https://forms.gle/44c65vuzoLorFpTQ8)

• კონკურსის ნამუშევრების წარდგენა: 2022 წლის 6 მაისი – 17 ივნისი;
• შედეგების გამოცხადება: 20 ივნისი – 1-ელი ივლისი.

ნამუშევრების წარმოდგენილ უნდა იქნეს ელექტრონული წესით,  ელ-ფოსტაზე: business@eeu.edu.ge

პროგრამა-კონკურსში მონაწილე პროექტებისგან ჟიური შეარჩევს 3 საუკეთესო პროექტს, რომლებიც იქნებიან პრემირებული ორგანიზატორის მიერ. ჟიურის შემადგენლობა წინასწარ არ სახელდება. ჟიურის წევრებს ეკრძალებათ მონაწილეებისთვის კონსულტაციების გაწევა და რაიმე სახით მათი დახმარება.

გამარჯვებულ პროექტებში საუკეთესოს მიეცემა რეკომენდაცია რეალიზაციისთვის.

გამარჯვებული პროექტის ავტორები დაჯილდოვდებიან ფულადი პრიზებით:

I ადგილი – 500 ლარი

II ადგილი – 350 ლარი

III ადგილი – 200 ლარი