აღმოსავლეთ ევროპის უნივერსიტეტის (EEU) ბიზნესისა და ინჟინერიის ფაკულტეტის ინიციატივითა და უწყვეტი განათლების ცენტრის (LLC) ორგანიზებით, 23 მარტს აღმოსავლეთ ევროპის უნივერსიტეტის კამპუსში გაიმართა საინფორმაციო შეხვედრა კომპანია „Holz House International“-ის წარმომადგენლებთან, რომელიც შეეხებოდა სტუდენტებისთვის სტაჟირებისა და დასაქმების შესაძლებლობებს კომპანიაში.
Holz House International წარმოადგენს თანამედროვე ხის სახლების წარმოებაზე სპეციალიზებულ საერთაშორისო კომპანიას, რომელიც ოპერირებს ამერიკის შეერთებულ შტატებსა და ევროპის სხვადასხვა ქვეყანაში და ბოლო პერიოდში საქმიანობას საქართველოშიც ავითარებს.
შეხვედრის ფარგლებში კომპანიის წარმომადგენლებმა დამსწრეებს გააცნეს კომპანია „Holz House International“, მისი საქმიანობის მიმართულებები, განვითარების სტრატეგია და საქართველოს ბაზარზე არსებული პერსპექტივები. განსაკუთრებული ყურადღება დაეთმო სტუდენტებისა და კურსდამთავრებულებისთვის კომპანიაში არსებული სტაჟირებისა და დასაქმების შესაძლებლობებს.
პრეზენტაციის ფარგლებში განხილული იყო:
-
კომპანიის განვითარების პერსპექტივები საქართველოს ბაზარზე;
-
კომპანიის არქიტექტურისა და დიზაინის დეპარტამენტის საქმიანობა;
-
მარკეტინგისა და გაყიდვების დეპარტამენტის ფუნქციები და საქმიანობის მიმართულებები;
-
კომპანიის მიმდინარე და დაგეგმილი პროექტები საქართველოში.
შეხვედრამ სტუდენტებს მისცა შესაძლებლობა დეტალურად გაცნობოდნენ კომპანიის საქმიანობას, პროფესიული განვითარების შესაძლებლობებსა და კარიერულ გზებს სამშენებლო სექტორში.
ღონისძიება გაიმართა ინტერაქტიულ ფორმატში და დასრულდა დისკუსიით, რომლის ფარგლებშიც სტუდენტებმა დასვეს შეკითხვები და მიიღეს დამატებითი ინფორმაცია კომპანიაში სტაჟირებისა და დასაქმების შესაძლებლობების შესახებ.