ქალაქ ბათუმის მერია ახორციელებს პროგრამას „ლუკა ასათიანის სახელობის სტიპენდია წარმატებული სტუდენტებისათვის“. პროგრამა ითვალისწინებს სტიპენდიის გაცემას ავტორიზებულ უმაღლეს სასწავლებლებში აკადემიური უმაღლესი განათლების პირველი და მეორე საფეხურის უმაღლეს საგანმანათლებლო პროგრამებზე მყოფ იმ სტუდენტებზე, რომლებიც უმაღლეს სასწავლებლებში ჩარიცხვის მომენტისთვის რეგისტრირებულნი არიან ქ. ბათუმის მუნიციპალიტეტის ტერიტორიაზე. გარდა აღნიშნულისა, სტიპენდიის მისაღებად წინა სემესტრის საშუალო აკადემიური მოსწრების დოკუმენტის თანახმად, ქვეპროგრამით განსაზღვრულ პრიორიტეტულ მიმართულებებზე მყოფ სტუდენტებს მიღებული უნდა ჰქონდეთ დადებითი შეფასება – მინიმუმ (B) – ძალიან კარგი, ხოლო სხვა დანაჩენ პროგრამებზე ჩარიცხულ სტუდენტებს – (A)-ფრიადი (91 ქულა და მეტი).
სტიპენდიის გაცემის დროს პირველ ეტაპზე განიხილება დაფინანსების საკითხი იმ კონკურსანტებისა, რომლებიც სწავლობენ შემდეგ საგანმანათლებლო პროგრამებზე/დარგებზე/მიმართულებებზე:
ა) ინჟინერია (მშენებლობა);
ბ) არქიტექტურა;
გ) ეკოლოგია/გარემოსმცოდნეობა;
დ) კულტურული მემკვიდრეობა;
ე) კულტურის/ხელოვნების მენეჯმენტი;
ვ) არქეოლოგია;
ზ) განათლების მეცნიერებები;
თ) მასწავლებლის განათლება.
ლუკა ასათიანის სახელობის სტიპენდია თვეში შეადგენს 200 ლარს, საქართველოს კანონმდებლობით გათვალსიწინებული გადასახადების ჩათვლით.
2019-2020 სასწავლო წლის პირველი სემესტრის განმავლობაში მიღებული შეფასებების მიხედვით სტიპენდიების მისაღებად განაცხადების მიღება ხდება 2020 წლის 31 მარტის ჩათვლით.
პროგრამის შესახებ დეტალური ინფორმაციის ნახვა შესაძლებელია ქ. ბათუმის მუნიციპალიტეტის მერიის ოფიციალურ ვებ-გვერდზე – https://batumi.ge/ge/