2022 წლის 17 ივნისს ტყიბულის მუნიციპალურ თეატრში გაიმართა ,,ვეფხისტყაოსნის“ საჯაროდ კითხვის დღისადმი მიძღვნილი ღონისძიება, რომელსაც აღმოსავლეთ ევროპის უნივერსიტეტიც შეუერთდა.
„ვეფხისტყაოსნის” კითხვის დღე აღინიშნა მუნიციპალიტეტის მკვიდრ უნიკალური ნიჭით გამორჩეულ – ვეფხისტყაოსნის ზეპირად მცოდნე ქალბატონებთან, ანრო ცირეკიძესთან და ნათელა დოღონაძესთან, ერთად. გერმანული ენის ფილოლოგი, დამსახურებული პედაგოგი, ტყიბულის საპატიო მოქალაქე ანრო ცირეკიძე „ვეფხისტყაოსნის“ ზეპირად მცოდნეთა კონკურსებში ექვსგზის გამარჯვებულია, ხოლო ნათელა დოღონაძე, რომელმაც მეუღლის დახმარებით პოემა 60 წლის ასაკში შეისწავლა, – სამცხე-ჯავახეთში გამართული „ვეფხისტყაოსნის“ კონკურსის III საპატიო ადგილის მფლობელი.
ღონისძიების დასაწყისში მათ პოემიდან ჯერ საყვარელი ეპიზოდები, შემდეგ კი შემთხვევით შერჩეული თავები ზეპირად წაიკითხეს.
„ვეფხისტყაოსნის” ზეპირად ცოდნის ტრადიციის გაგრძელებისა და კულტურული მემკვიდრეობის შენარჩუნების საქმეში შეტანილი წვლილისათვის ანრო ცირეკიძე და ნათელა დოღონაძე აღმოსავლეთ ევროპის უნივერსიტისგან 1000-1000 ლარით დაჯილდოვდნენ, მათ ფულადი საჩუქრები უნივერსიტეტის წარმომადგენელმა მარიამ ლიკლიკაძემ გადასცა.
ისინი ასევე დააჯილდოვა ტყიბულის მუნიციპალიტეტის მერმა, დავით ჩერქეზიშვილმა, ფულადი საჩუქრით, 1000-1000 ლარით.
ღონისძიებას იმერეთში სახელმწიფო რწმუნებულის მოადგილე ლევან კიკნაველიძე, ტყიბულის მაჟორიტარი დეპუტატი, ბეჟან წაქაძე, საკრებულოს თავმჯდომარე, იოსებ რობაქიძე, პროფესორი, ისტორიის მეცნიერებათა დოქტორი სერგო ვარდოსანიძე, საქართველოს რუსთაველის საზოგადოების ქუთაისის ორგანიზაციის თავმჯდომარე, მერაბ კვიცარიძე, ადგილობრივი თვითმმართველობის წარმომადგენლები და სხვა მოწვეული სტუმრები ესწრებოდნენ.
