Erasmus+-ის პერსონალის გაცვლითი პროგრამის ფარგლებში აღმოსავლეთ ევროპის უნივერსიტეტს (EEU), მიმდინარე წლის 15 დეკემბერს ნიქოზიის უნივერსიტეტის (კვიპროსი) ერთობლივი საგანმანათლებლო პროგრამების კოორდინატორი, ანთი ტზიაკოურა ეწვია.
ანთი ხელმძღვანელობს უნივერსიტეტის საერთაშორისო თანამშრომლობას უცხოეთის პარტნიორ ინსტიტუტებთან ერთობლივი საგანმანათლებლო პროგრამების შემუშავებისა და განხორციელების მიმართულებით. იგი ასევე მუშაობდა როგორც აკადემიური მრჩეველის პოზიციაზე დისტანციური სწავლების დეპარტამენტში, ასევე – საერთაშორისო ურთიერთობების კოორდინატორად სტუდენტთა მიღების დეპარტამენტში.
ვიზიტის ფარგლებში ანთი ტზიაკოურა შეხვდა აღმოსავლეთ ევროპის უნივერსიტეტის საერთაშორისო ურთიერთობების დეპარტამენტის უფროსს, თეონა ხაჩიძესა და განათლების მეცნიერებების ფაკულტეტის დეკანს, ქეთევან აფთარაშვილს.
აღმოსავლეთ ევროპის უნივერსიტეტისა და ნიქოზიის უნივერსიტეტის ერთობლივი ინიციატივით, ანთი ტზიაკოურამ ჩაატარა საჯარო ლექციაც. მან აუდიტორიას გააცნო კვიპროსის განათლების სისტემა და გაუზიარა ელექტრონული სწავლების მიმართულებით ნიქოზიის უნივერსიტეტის გამოცდილება.
ღონისძიების მეორე ნაწილი დისკუსიას დაეთმო, რომლის ფარგლებში სპიკერმა ინტერაქტიული დიალოგი გამართა მსმენელებთან, განიხილა აქტუალური საკითხები და უპასუხა დამსწრეთა შეკითხვებს.
საჯარო ლექციას ესწრებოდნენ აღმოსავლეთ ევროპის უნივერსიტეტის ადმინისტრაციული და აკადემიური პერსონალის წარმომადგენლები, სამივე საფეხურის სხვადასხვა ფაკულტეტის სტუდენტები.
ქ. თბილისი, ი. ენუქიძის ქ. 6 (აშშ საელჩოს მიმდებარედ)
+995 32 248 01 41