2024 წლის 4 აპრილს, აღმოსავლეთ ევროპის უნივერსიტეტში ვარლამ ჩერქეზიშვილის სახ. ინტერდისციპლინური კვლევების ცენტრის (EEU) სპეციალური მოწვევით ნორვიჩის ხელოვნების უნივერსიტეტის (დიდი ბრიტანეთი) პროფესორი, დოქტორი იულიანა გავრილი იმყოფებოდა.
ვიზიტის ფარგლებში პროფესორი შეხვდა EEU ბიზნესისა და ინჟინერიის ფაკულტეტის ადმინისტრაციულ პერსონალს და არქიტექტურის საბაკალავრო პროგრამის სტუდენტებისთვის გამართა ვორქშოპი სახელწოდებით: ,,სიზმრისეული სახლები – სახლების წარმოსახვითი კონსტრუირება, როგორც წარმოსახვის კრიზისის სიგნალი’’.
შეხვედრა გახსნა ვარლამ ჩერქეზიშვილის სახ. ინტერდისციპლინური კვლევების ცენტრის (EEU) ხელმძღვანელმა, პროფესორმა გიორგი თავაძემ.
ვორქშოპის მიმდინარეობისას იულიანა გავრილმა განიხილა საკუთარი კვლევა, რომელიც შეისწავლის წარმოსახვისა და ფანტაზიის მნიშვნელობას არქიტექტურული პრაქტიკისთვის. მოხსენებისას მან ყურადღება სიზმრისეული (საოცნებო, იდეალური) სახლის ცნებაზეც გაამახვილა და ისაუბრა სახლების კონსტრუირების ინოვაციური მეთოდების შესახებ.
ღონისძიება დასრულდა შემაჯამებელი დისკუსიით. მსმენელებისთვის საინტერესო კითხვებს იულიანა გავრილმა დეტალურად უპასუხა.