აღმოსავლეთ ევროპის უნივერსიტეტის (EEU) ფიზიკური, მენტალური და სოციალური კეთილდღეობის სამეცნიერო კვლევითი ცენტრის (PMSW) ინიციატივითა და უწყვეტი განათლების ცენტრის (LLC) ორგანიზებით 2024 წლის 29 მაისს ვორქშოპების სერიის რიგით მეორე შეხვედრა გაიმართა, რომელიც შეეხებოდა აკადემიური პერსონალის კეთილდღეობას.
აღნიშნულ ღონისძიებას ესწრებოდნენ აღმოსავლეთ ევროპის უნივერსიტეტის სტუდენტები და პერსონალი. სპიკერებმა საკუთარი მოსაზრებები, პრაქტიკული გამოცდილება და სამომავლო გეგმები გაუზიარეს დამსწრე საზოგადოებას.
ღონისძიება გახსნა აღმოსავლეთ ევროპის უნივერსიტეტის რექტორმა, ფიზიკური, მენტალური და სოციალური კეთილდღეობის სამეცნიერო კვლევითი ცენტრის ხელმძღვანელმა, პროფესორმა კახაბერ ლაზარაშვილმა.
შეხვედრის ძირითადი ნაწილი დაეთმო ფიზიკური, მენტალური და სოციალური კეთილდღეობის სამეცნიერო კვლევითი ცენტრის მკვლევარის ნათია გეგელაშვილის პრეზენტაციას: „აკადემიური პერსონალის კეთილდღეობაზე მოქმედი ფაქტორები“. აღნიშნული კვლევა ჩატარდა ფიზიკური, მენტალური და სოციალური კეთილდღეობის სამეცნიერო კვლევითი ცენტრის საქმიანობის ფარგლებში და მიმდინარე წლის სექტემბერში გამოქვეყნდება სორბონის უნივერსიტეტის მაღალრეიტინგული სამეცნიერო ჟურნალის სპეციალურ გამოცემაში: “International Journal of Health, Wellness, and Society”.
მიღებული შედეგების ფსიქოლოგიურ საფუძვლებზე და გამომწვევ მიზეზებზე ისაუბრა აღმოსავლეთ ევროპის უნივერსიტეტის ასისტენტ-პროფესორმა, სოციალურ მეცნიერებათა დოქტორმა, გიორგი წიკლაურმა.
ვორქშოპი დასრულდა შემაჯამებელი დისკუსიით, სადაც სპიკერებმა დეტალურად უპასუხეს აუდიტორიის მიერ დასმულ შეკითხვებს.