აღმოსავლეთ ევროპის უნივერსიტეტში ხშირად იმართება სხვადასხვა სახის შიდა და გარე სტუდენტური აქტივობა. სოციალურ, საქველმოქმედო, სპორტულ, კულტურულ, ინტელექტუალურ თუ შემეცნებით ღონისძიებებში EEU-ს სტუდენტები მუდმივად მონაწილეობენ.
უნივერსიტეტის ფარგლებში პერიოდულად იმართება საჯარო შეხვედრები სხვადასხვა სფეროში წარმატებულ და ცნობილ ადამიანებთან, რომლის დროსაც სტუდენტებს კითხვა-პასუხის რეჟიმში მონაწილეობისა და სტუმართან საინტერესო საკითხებზე საუბრის საშუალება ეძლევათ.
EEU ყოველწლიურად იღებს მონაწილეობას სტუდენტურ დღეებში, ასევე მჭიდროდ თანამშრომლობს საუნივერსიტეტო სპორტის ფედერაციასთან, რომლის ფარგლებში გამართულ სხვადასხვა სპორტულ შეჯიბრებაში უნივერსიტეტის სტუდენტები აქტიურად მონაწილეობენ.
სტუდენტები ასევე აქტიურად არიან ჩართულნი სოციალურ ქსელში. აღმოსავლეთ ევროპის უნივერსიტეტის ოფიციალურ FB-გვერდზე ხშირად ცხადდება შემეცნებითი, თემატური და სახალისო კონკურსები. გამარჯვებულები კი EEU-სგან საინტერესო და გამორჩეული პრიზებით საჩუქრდებიან.
აღმოსავლეთ ევროპის უნივერსიტეტის აქტიური სპორტის მოყვარულ სტუდენტებს საშუალება აქვთ გაერთიანდნენ საუნივერსიტეტო სპორტულ გუნდებში და მიაღწიონ წარმატებას მათთვის სასურველ სპორტულ ნაირსახეობაში:
- ფეხბურთი
- კალათბურთი
- ფრენბურთი
- ჭადრაკი
- ფუტსალი
ასევე, აღმოსავლეთ ევროპის უნივერსიტეტი მჭიდროდ თანამშრომლობს საუნივერსიტეტო სპორტის ფედერაციასთან, რომლის ფარგლებში გამართულ სხვადასხვა სპორტულ შეჯიბრებაში უნივერსიტეტის სტუდენტები აქტიურად მონაწილეობენ. EEU-სთვის განსაკუთრებით წარმატებული აღმოჩნდა ზამთრის უნივერსიადა 2017. უნივერსიტეტის სტუდენტმა სოსლან ბაკაევმა ტურნირის ფარგლებში გამართული სამი სახეობიდან მონაწილეობა ორ სახეობაში (გიგანტური სლალომი და სათხილამურო კროსი) მიიღო და ორივე შეჯიბრებაში პირველი ადგილი მოიპოვა.
მინი ფეხბურთი
აღმოსავლეთ ევროპის უნივერსიტეტის ორგანიზებით ყოველწლიურად მინი ფეხბურთში სასკოლო ტურნირი იმართება. შეჯიბრმა უკვე ტრადიციული ხასიათი მიიღო და მეხუთე წელია ტარდება. სასკოლო ტურნირში ყოველ წელს თბილისის საჯარო და კერძო სკოლის ასობით მოსწავლე იღებს მონაწილეობას. ტურნირის მიზანი სპორტულ ცხოვრებაში მოსწავლეთა ჩართულობა, ჯანსაღი ცხოვრების წესის დამკვიდრება და ახალგაზრდებში ფეხბურთის პოპულარიზაციაა. გამარჯვებული გუნდის წევრები უნივერსიტეტისგან ფულადი პრიზებითა და ფასიანი საჩუქრებით ჯილდოვდებიან.
ფუტსალი
აღმოსავლეთ ევროპის უნივერსიტეტში უკვე მე-2 წელია ფუტსალის გუნდი არსებობს, რომელიც ყოველწლიურად საუნივერსიტეტო სპორტის ფედერაციის მიერ გამართულ ფუტსალის ჩემპიონატში აქტიურად იღებს მონაწილეობას. წარმატებული იყო გუნდისთვის 2016 წელი, ვინაიდან არსებობის მცირე პერიოდის მიუხედავად გუნდი მეოთხედფინალში გადავიდა და თსუ-ს სამგზის გამარჯვებულ ფუტსალის გუნდთან ღირსეულად იასპარეზა. გუნდის წევრები ხშირად ამხანაგურ შეხვედრებსაც მართავენ. ისინი მუდმივ რეჟიმში ვარჯიშობენ, რათა მომდევნო ტურნირში წარმატებულად შეძლონ ასპარეზობა.