2023 წლის 25 თებერვალს, 14:00 საათზე EEU-ს დიდ საკონფერენციო დარბაზში (401) გაიმართება აღმოსავლეთ ევროპის უნივერსიტეტის პროფესორის, შალვა კვინიხიძის წიგნის პრეზენტაცია: ,,საერთაშორისო საპოლიციო თანამშრომლობის სამართალი ბრძოლა ტრანსნაციონალურ ორგანიზებულ დანაშაულთან“.
ორგანიზებული დანაშაული და მისი სხვადასხვა ფორმა, იქნება ეს ერთი ქვეყნის საზღვრებში თუ ექნება მას ტრანსნაციონალური ხასიათი, თანამედროვე მსოფლიოს ერთ-ერთ ძირითად გამოწვევასა და პრობლემას წარმოადგენს.
მასთან ბრძოლაში აქტიურად არიან ჩართული, როგორც ერთი ქვეყნის სამართალდამცავი სტრუქტურები, ასევე სხვადასხვა ქვეყნები ორმხრივი თანამშრომლობისა და საერთაშორისო ორგანიზაციების მრავალმხრივი თანამშრომლობის ფორმატებით.
საქართველოსთვის საერთაშორისო საპოლიციო თანამშრომლობის სამართალი გარკვეულ სიახლეს წარმოადგენს, იმის გათვალისწინებით, რომ სამართლებრივი საფუძვლებით, დამკვიდრებული პრაქტიკით და ინსტიტუციურად სამართლის ეს დარგი ახლახან ჩამოყალიბდა.
შესაბამისად, წიგნში განხილულია სამართლის ამ დარგის ისტორიული განვითარება, სუბიექტები, სამართლის წყაროები, დარგის ჩამოყალიბებისთვის აუცილებელი ნიშან-თვისებები, საერთაშორისო საპოლიციო თანამშრომლობის საფუძვლები, ფორმები და სახეები, როგორც გლობალურად, ასევე საქართველოს მაგალითზე.