აღმოსავლეთ ევროპის უნივერსიტეტის (EEU) ჯანდაცვის მეცნიერებათა ფაკულტეტის ინიციატივითა და EEU-ს უწყვეტი განათლების ცენტრის (LLC) ორგანიზებით 19-22 აპრილს გაიმართა ტრენინგ-კურსების სერია: ,,შეფასება სამედიცინო განათლებაში’’.
ტრენინგ-კურსების მიზანი ჯანდაცვის მეცნიერებათა ფაკულტეტის დიპლომირებული მედიკოსის (ინგლისურენოვანი) ერთსაფეხურიანი საგანმანათლებლო პროგრამის განმახორციელებელი პერსონალისთვის სამედიცინო განათლების შეფასების თანამედროვე მეთოდოლოგიის მიმართულებით კვალიფიკაციის ამაღლება იყო.
ტრენინგს უძღვებოდა მედიცინის დოქტორი, არაბეთის გაერთიანებული საამიროების უნივერსიტეტის ასოცირებული პროფესორი აიჰან ს. კალისკან. მას აქვს მრავალწლიანი გამოცდილება სამედიცინო განათლების ადმინისტრირების, მონიტორინგისა და სწავლა-სწავლების მიმართულებით. ის არის თურქეთისა და ევროპის სხვადასხვა სასერტიფიკაციო საგამოცდო საბჭოს წევრი და შემფასებელი.
კურსის ფარგლებში მსმენელები გაეცნენ:
- სამედიცინო განათლების შეფასების თანამედროვე სისტემას, ცოდნის შეფასებას;
- ქმედების შეფასებას, ობიექტურად სტრუქტურირებულ პრაქტიკულ გამოცდას (OSPE);
- ობიექტურად სტრუქტურირებულ კლინიკურ გამოცდას (OSCE);
- სამუშაო ადგილზე დაფუძნებულ შეფასებას (WPBA); მინი-კლინიკური შეფასების სავარჯიშოს (Mini-CEX).
კურსი მოიცავდა პრაქტიკულ ნაწილს, რომელიც დაეთმო:
- ღია და დახურული კითხვების ფორმულირებასა და შედგენას;
- OSPE-ის ორგანიზებასა და პილოტირებას;
- OSCE-ის ორგანიზებასა და პილოტირებას;
- Mini-CEX-ის დემონსტრაციას; პროცედურულ უნარებზე პირდაპირ დაკვირვებასა (DOPS) და DOPS-ის დემონსტრაციას.
ტრენინგ-კურსების სერია განხორციელდა აღმოსავლეთ ევროპის უნივერსიტეტის კლინიკური და პრაქტიკული უნარ-ჩვევების განვითარების ცენტრში მსმენელთა აქტიური ინტერაქციით.
ღონისძიების ბოლოს მსმენელებს კურსში მონაწილეობისათვის გადაეცათ სერტიფიკატები.
