ნათია გეგელაშვილი (ასისტენტ-პროფესორი)

განათლების მეცნიერების დოქტორი

მიმართულება: განათლება

ნათია გეგელაშვილი არის განათლების მეცნიერების დოქტორი. 2025 წელს მან წარმატებით დაასრულა აღმოსავლეთ ევროპის უნივერსიტეტისა და  ლონდონის მიდელსექსის უნივერსიტეტის ერთობლივი სადოქტორო პროგრამა განათლების მეცნიერებების მიმართულებით. იგი ფლობს კომუნიკაციის კვლევების მაგისტრის ხარისხს იოჰანეს გუტენბერგის უნივერსიტეტიდან (გერმანია), რომელიც მიენიჭა 2016 წელს. ასევე აქვს ორი ბაკალავრის ხარისხი: პუბლიცისტიკა/სოციოლოგია – იოჰანეს გუტენბერგის უნივერსიტეტი (2013) და ტელე-რადიო ჟურნალისტიკა – ივანე ჯავახიშვილის სახელობის თბილისის სახელმწიფო უნივერსიტეტი (2006). მისი აკადემიური მომზადება ასახავს ინტერდისციპლინურ გამოცდილებას განათლების მეცნიერებების, სოციოლოგიის, კომუნიკაციისა და მედიის კვლევების მიმართულებით.

ნათია გეგელაშვილს აქვს ფართო პროფესიული გამოცდილება როგორც თვისებრივი, ასევე რაოდენობრივი კვლევის მიმართულებით. 2014-2022 წლებში იგი მუშაობდა გერმანიაში, კვლევითი პროექტების მენეჯერად და მკვლევრად IFAK – ბაზრისა და სოციალური კვლევების ინსტიტუტში (ვაისბადენი, გერმანია), სადაც ხელმძღვანელობდა საერთაშორისო კვლევით პროექტებს, მუშაობდა კვლევის ინსტრუმენტების შემუშავებაზე, კოორდინირებას უწევდა საველე სამუშაოებს, ახორციელებდა მონაცემთა ანალიზს და ამზადებდა მტკიცებულებებზე დაფუძნებულ რეკომენდაციებს საერთაშორისო პარტნიორებისთვის.

2022 წლიდან ნათია გეგელაშვილი აფილირებულია აღმოსავლეთ ევროპის უნივერსიტეტთან, სადაც მუშაობს კვლევისა და განვითარების დეპარტამენტის უფროს სპეციალისტად და მონაწილეობს სამეცნიერო საქმიანობის მხარდაჭერაში, საგრანტო პროექტების მომზადებასა და საერთაშორისო აკადემიური თანამშრომლობის გაძლიერებაში. 2024 წლიდან იგი ასევე არის საქართველოს განათლების ხარისხის განვითარების ეროვნული ცენტრის ავტორიზაციისა და აკრედიტაციის ექსპერტთა კორპუსის წევრი.

ნათია გეგელაშვილის აკადემიური და კვლევითი ინტერესები მოიცავს სტუდენტზე ორიენტირებულ სწავლებას (SCL), უმაღლესი განათლების პოლიტიკას, საგანმანათლებლო ხარისხის უზრუნველყოფას, სტუდენტებისა და აკადემიური პერსონალის კეთილდღეობას და უმაღლესი განათლების კურსდამთავრებულთა დასაქმებას.

ნათია გეგელაშვილის სამეცნიერო ნაშრომები მოიცავს რეცენზირებულ ჟურნალებში გამოქვეყნებულ სტატიებს, კონფერენციის მასალებსა და საერთაშორისო რედაქტირებულ კრებულებში შეტანილ ნაშრომებს. მისი პუბლიკაციები ინდექსირებულია Scopus-ში, Springer-ში და სორბონის უნივერსიტეტთან აფილირებულ ჟურნალებში. იგი ასევე აქტიურად მონაწილეობს ადგილობრივ და საერთაშორისო სამეცნიერო კონფერენციებში.

ნათია გეგელაშვილს მიღებული აქვს არაერთი აკადემიური ჯილდო და კვლევითი გრანტი, მათ შორის შოთა რუსთაველის ეროვნული სამეცნიერო ფონდის სადოქტორო კვლევის გრანტი და საერთაშორისო კვლევითი ქსელის Health, Wellness and Society (გრანადა, ესპანეთი) Emerging Scholar Award. იგი ფლობს ქართულ, გერმანულ და ინგლისურ ენებს და აქტიურად არის ჩართული ინტერდისციპლინურ კვლევით პროექტებში როგორც ეროვნულ, ისე საერთაშორისო დონეზე.