ახალგაზრდებში აფხაზეთის საკითხისადმი ინტერესის გაჩენისა და ზოგადად ამ თემის პოპულარიზაციის მიზნით, აფხაზეთის ავტონომიური რესპუბლიკის მთავრობა აგრძელებს ქვეპროგრამას – ,,დიმიტრი (არზაყან) ემუხვარის და ჟიული შარტავას სახელობის სტიპენდიები“. სტიპენდია დაწესდა აფხაზეთის თემატიკაზე მომუშავე მაღალი აკადემიური მოსწრების (80% და მეტი) მქონე ბაკალავრიატისა და მაგისტრატურის იმ სტუდენტებისთვის, რომლებიც არიან საზოგადოებრივად აქტიურნი, მონაწილეობდნენ სხვადასხვა კონფერენციაში. სამიზნე ჯგუფის წარმომადგენლებს გარდა დასახელებულისა, ასევე გამოქვეყნებული უნდა ჰქონდეთ სამეცნიერო ნაშრომები.
დიმიტრი (არზაყან) ემუხვარის სახელობის სტიპენდია გაიცემა პოლიტიკის მეცნიერების დარგში განსაკუთრებული მიღწევებისა და წარმატებების მქონე სტუდენტებზე, ჟიული შარტავას სახელობის სტიპენდია კი დაწესდა სხვა დარგის სტუდენტებისთვის.
სტიპენდია გაიცემა არაუმეტეს ერთ სტუდენტიზე მაგისტრატურის საფეხურზე თვეში 150, ხოლო ბაკალავრიატზე 100 ლარის ოდენობით. სტიპენდიანტებს სტიპენდია ეძლევათ დანიშვნის დღიდან ყოველთვიურად ერთი სასწავლო წლის (10 თვე) განმავლობაში. მათ აარჩევს შვიდი წევრით დაკომპლექტებული კომისია, რომელსაც ამტიცებს აფხაზეთის ა/რ განათლებისა და კულტურის მინისტრი. კომისია არა მარტო ანიჭებს სტუდენტს სტიპენდიანტის სტატუსს, არამედ მას ასევე აქვს უფლება სტუდენტს ვადაზე ადრე მოუხსნას სტიპენდია თუ მას სტატუსი შეუჩერდება ან შეუწყდება.
სტიპენდიის მისანიჭებლად შესაბამისი დოკუმენტაცია (წარდგინება, ერთი რეკომენდაცია, პირადობის მოწმობის ასლი, სტუდენტის სასწავლო ბარათი, ინფორმაცია საზოგადოებრივი აქტივობის შესახებ, სამეცნიერო ნაშრომების და სამეცნიერო კონფერენციებში მონაწილეობის დამადასტურებელი დოკუმენტაცია, სიგელები, სერტიფიკატები არსებობის შემთხვევაში) კანდიდატებმა უნდა წარადგინონ საგანმანათლებლო დაწესებულებაში, რის შემდეგაც უნივერსიტეტი მათ წარადგენს მინისტრთან, რომელიც, თავის მხრივ, აღნიშნულ დოკუმენტაციას გადასცემს კომისიას განსახილველად.
აფხაზეთის ა/რ განათლებისა და კულტურის სამინისტო განცხადების წარდგენის ვადას სასწავლო წლის დასრულების შემდეგ გამოაცხადებს. გამოცხადებული ვადის გასვლის შემდეგ წარდგენილი განცხადებები არ განიხილება. სტიპენდიის თაობაზა განცხადებას კომისია ღია წესით განიხილავს 10 აგვისტომდე და გადაწყვეტილებას მიიღებს ფარული კენჭისყრით. კომისიის წევრს უფლება აქვს, მოითხოვოს სხდომაზე კანდიდატურის დასწრება ან მისგან დამატებითი ინფორმაციის მიღება.