მიმდინარე წლის 5 მაისს, აღმოსავლეთ ევროპის უნივერსიტეტს სტუმრობდნენ ევროკომისიის Horizon Europe-ის პროგრამების საკონტაქტო პირი, კვლევების ტექნოლოგიებისა და ინოვაციების საერთაშორისო ცენტრის დირექტორი გივი ქოჩორაძე და არაორგანული ქიმიისა და ელექტროქიმიის ინსტიტუტის დირექტორი თამაზ მარსაგიშვილი.
Horizon Europe კვლევისა და ინოვაციების დარგში ევროკავშირის ძირითადი დაფინანსების პროგრამაა, რომლის ბიუჯეტი 95,5 მილიარდი ევროა. აღნიშნული თანხა, შვიდი წლის განმავლობაში (2021-2027) გრანტების სახით გაიცემა.
პროგრამა მხარს უჭერს ევროკავშირის პოლიტიკის შექმნასა და განხორცილებას კვლევებისა და ინოვაციების სფეროში, ქვეყნებს შორის თანამშრომლობის გაღრმავების, ახალი ცოდნისა და ტექნოლოგიების შექმნისა და გავრცელების გზით.
Horizon Europe საქართველოს ოფისის მისიაა ევროკავშირის კვლევისა და ინოვაციის ჩარჩო პროგრამაში “Horizon Europe“ საქართველოს ჩართულობის გაძლიერება და ევროპულ კონსორციუმებში ქართველ აპლიკანტთა მონაწილეობის გაზრდა. ეროვნული ოფისის მიზნებია ქართველ აპლიკანტთა ჩართულობის ხელშეწყობა, ტექნიკური დახმარების, მათ შორის თემატური ტრენინგებისა და კონსულტაციების უზრუნველყოფა; Horizon Europe პროგრამის პოპულარიზაცია, სხვადასხვა სახის საინფორმაციო ღონისძიებების ორგანიზებისა და ინფორმაციის გავრცელების საშუალებით; Horizon Europe-ს ეროვნული საპარტნიორო ქსელის განვითარება და საერთაშორისო თანამშრომლობის გაღრმავების ხელშეწყობა.
აღმოსავლეთ ევროპის უნივერსიტეტში გამართულ შეხვედრას ფაკულტეტების წარმომადგენლებისა და საგრანტო პროექტებით დაინტერესებული აკადემიური პერსონალის გარდა ესწრებოდნენ ვიცე-რექტორი სამეცნიერო საკითხებში – შალვა მაჭავარიანი, ვიცე-რექტორი სასწავლო პროცესის ადმინისტრირების საკითხში – რუსუდან ჩიქოვანი და ვიცე-რექტორი საერთაშორისო და ადმინისტრაციულ საკითხებში – თეა იმედაძე;
პროფ. გივი ქოჩორაძემ დამსწრე საზოგადოებას დეტალურად გააცნო ევროკომისიის ჩარჩო პროგრამები, Horizon Europe და კონკურსებში მონაწილეობისთვის საჭირო პირობები.
შეხვედრის ბოლოს, მხარეებმა განიხილეს Horizon Europe კონკურსების თავისებურებები და აღნიშნულ კონკურსებში აღმოსავლეთ ევროპის უნივერსიტეტის ჩართულობის პერსპექტივები.