აღმოსავლეთ ევროპის უნივერსიტეტში (EEU) განათლების მეცნიერებების ფაკულტეტისა და სადოქტორო და უმაღლესი განათლების კვლევების განვითარების ცენტრის ინიციატივით მიმდინარე წლის 6 დეკემბერს დოქტორანტთა რიგით მესამე ეროვნული სამეცნიერო კონფერენცია გაიმართა.
კონფერენციის მიზანს წარმოადგენდა ისეთი პლატფორმის შექმნა, რომლის ფარგლებშიც დოქტორანტები შეძლებენ სხვადასხვა დარგში უახლესი კვლევების წარმოდგენასა და კვლევითი უნარების გაუმჯობესებას, განსხვავებული დისციპლინების წარმომადგენლებს შორის დიალოგსა და თანამშრომლობის ხელშეწყობას.
კონფერენცია გახსეს აღმოსავლეთ ევროპის უნივერსიტეტის რექტორმა, პროფესორმა კახაბერ ლაზარაშვილმა და EEU-ს აკადემიური კოლეგიის თავმჯდომარემ, პროფესორმა დავით ჩერქეზიშვილმა.
მონაწილეებს მიესალმნენ სსიპ – განათლების ხარისხის განვითარების ეროვნული ცენტრის ხელმძღვანელი- ლაშა მარგიშვილი, სადოქტორო და უმაღლესი განათლების კვლევების განვითარების ცენტრის ხელმძღვანელი, ემერიტუსი პროფესორი პოლ გიბსი და EEU-ს განათლების მეცნიერებების ფაკულტეტის დეკანი, ასოცირებული პროფესორი ქეთევან აფთარაშვილი.
ამასთან ერთად, აღსანიშნავია, რომ გამოიცა დოქტორანტთა კონფერენციის მეორე კრებული (რედ. პოლ გიბსი, ქეთევან აფთარაშვილი), რომლის პრეზენტაციაც დოქტორანტთა მესამე ეროვნულ კონფერენციაზე გაიმართა.
კონფერენციის მთავარი მომხსენებელად მოწვეული იყო სორბონის უნივერსიტეტის (პარიზი) პროფესორი და EEU-ს განათლების მეცნიერებების (ინგლისურენოვანი) სადოქტორო პროგრამის ხელმძღვანელი – ლუიზ დელინგუოთერი, რომელმაც წარადგინა მოხსენება დოქტორანტთა გამოწვევებზე 21-ე საუკუნეში და გამართა დისკუსია დოქტორანტებთან მათ საჭიროებებსა და გამოწვევებზე.
კონფერენციაში მონაწილეობას იღებდა საქართველოს 10 სხვადასხვა კერძო და საჯარო უნივერსიტეტის 50-მდე დოქტორანტი. ღონისძიება მიმდინარეობდა ორ პარალელურ სესიად:
- განათლება, ბიზნესი და ეკონომიკა (მოდერატორები: პროფ. დავით ჩერქეზიშვილი, პროფ. კახაბერ ლაზარაშვილი, პროფ. დავით სიხარულიძე, პროფ. ლუიზ დელინგუოთერ, პროდ. ვასილ კიკუტაძე)
- სამართალი (მოდერატორები: პროფ. შალვა კვინიხიძე, პროფ. ზუხრა მაცაბერიძე)
კონფერენციის მიმდინარეობისას გაიმართა პანელური დისკუსიები, რომლებიც მიმართული იყო დოქტორანტისთვის კრიტიკულად მნიშვნელოვანი უნარების განვითარების ხელშეწყობისკენ: მათ შორის, ეფექტიანი კომუნიკაცია, კვლევის მეთოდოლოგია, აკადემიური წერის უნარები და კარიერული განვითარება. აქტივობების ფარგლებში დოქტორანტებმა მიიღეს ღირებული რჩევები დარგის ექსპერტებისგან.
ღონისძიების ყველა მონაწილეს გადაეცა სერტიფიკატები და დოქტორანტთა მეორე ეროვნული სამეცნიერო კონფერენციის მასალების (2024) კრებული, რომელიც აერთიანებს 2024 წლის 6 ივლისს გამართულ დოქტორანტთა მეორე ეროვნული სამეცნიერო კონფერენციაზე წარმოდგენილ სამეცნიერო ნაშრომებს. ამავდროულად დაანონსდა დოქტორანტთა მე-4 სამეცნიერო კონფერენციაზე წარმოდგენილი ნაშრომების სამეცნიერო შრომების კრებულის გამოცემა.
კონფერენციის დღის წესრიგი იხ. ბმულზე: https://eeu.edu.ge/wp-content/uploads/2025/12/agenda.pdf
კონფერენციის საორგანიზაციო კომიტეტი:
- ქეთევან აფთარაშვილი (კომიტეტის თავმჯდომარე, განათლების მეცნიერებების ფაკულტეტის დეკანი)
- ანი ყველაშვილი (წევრი, EEU-ს განათლების მეცნიერებების ფაკულტეტის დეკანის მოადგილე)
- მარიამ ლიკლიკაძე (წევრი, EEU-ს უწყვეტი განათლებისა და სტუდენტური სერვისების ცენტრის ხელმძღვანელი)
- თეონა ხაჩიძე (წევრი, EEU-ს საერთაშორისო ურთიერთობების დეპარტამენტის უფროსი)
- ნათია გეგელაშვილი (წევრი, სამეცნიერო კვლევებისა და განვითარების დეპარტამენტის კოორდინატორი)
