ვიზიტის მთავარ მიზანს EEU-ის საერთაშორისო ცნობადობის გაზრდა, დიპლომირებული მედიკოსის ერთსაფეხურიანი და საექთნო საქმის საბაკალავრო პროგრამების პოპულარიზაცია, ასევე საერთაშორისო აპლიკანტებისთვის უნივერსიტეტში სწავლის შესაძლებლობების გაცნობა წარმოადგენდა. ღონისძიებები მნიშვნელოვანი პლატფორმა იყო საერთაშორისო საგანმანათლებლო თანამშრომლობის გაღრმავებისა და ახალი პარტნიორული ურთიერთობების განვითარებისათვის.
ვიზიტის ფარგლებში უნივერსიტეტის წარმომადგენლებმა მონაწილეობა მიიღეს არაერთ პოდკასტსა და ინტერვიუში, სადაც საერთაშორისო აუდიტორიას გააცნეს საქართველოს უმაღლესი განათლების სისტემა, ქვეყნის საგანმანათლებლო გარემო და აღმოსავლეთ ევროპის უნივერსიტეტში სწავლის შესაძლებლობები. გაიმართა ინდივიდუალური კონსულტაციები, საინფორმაციო შეხვედრები და პრეზენტაციები მომავალ სტუდენტებსა და მათ მშობლებთან. შეხვედრებისას უნივერსიტეტის წარმომადგენლებმა დამსწრეებს დეტალურად გააცნეს დიპლომირებული მედიკოსის ერთსაფეხურიანი და საექთნო საქმის საბაკალავრო პროგრამები, სასწავლო პროცესი, საერთაშორისო აკადემიური გარემო, კლინიკური სწავლების შესაძლებლობები და EEU-ში სწავლის ძირითადი უპირატესობები.
განსაკუთრებული ყურადღება დაეთმო უნივერსიტეტის თანამედროვე სასწავლო ინფრასტრუქტურას, ახლად გახსნილ კლინიკური უნარების ცენტრს, კლინიკურ ბაზებს, სტუდენტებზე ორიენტირებულ მხარდამჭერ სერვისებსა და იმ პრაქტიკულ შესაძლებლობებს, რომლებიც სტუდენტებს მაღალი ხარისხის თეორიული, კლინიკური და პროფესიული ცოდნის მიღებაში ეხმარება.
ვიზიტის ერთ-ერთი მნიშვნელოვანი ნაწილი იყო აღმოსავლეთ ევროპის უნივერსიტეტის კურსდამთავრებულებთან შეხვედრები. EEU განსაკუთრებულ მნიშვნელობას ანიჭებს კურსდამთავრებულებთან მუდმივი კავშირის შენარჩუნებას, მათი პროფესიული განვითარების მხარდაჭერასა და სამომავლო თანამშრომლობის შესაძლებლობების განხილვას, რაც უნივერსიტეტის საერთაშორისო საზოგადოების კიდევ უფრო გაძლიერებას უწყობს ხელს.
საგანმანათლებლო გამოფენებმა მნიშვნელოვანი ინტერესი გამოიწვია საერთაშორისო აპლიკანტებს შორის, რის შედეგადაც უნივერსიტეტმა მრავალ პოტენციურ სტუდენტთან დაამყარა პირდაპირი კომუნიკაცია და გააფართოვა თანამშრომლობის შესაძლებლობები ადგილობრივ პარტნიორებთან.
