აღმოსავლეთ ევროპის უნივერსიტეტი (EEU) ევროპის უნივერსიტეტების ასოციაციის სადოქტორო განათლების საბჭოს (EUA-CDE) წევრი გახდა.
ევროპის უნივერსიტეტების ასოციაციის სადოქტორო განათლების საბჭო (EUA-CDE) 2008 წელს შეიქმნა და აქტიურ საქმიანობას ეწევა ევროპაში სადოქტორო განათლების პოლიტიკის განსაზღვრისა და განვითარების მიმართულებით. ევროპულ საგანმანათლებლო სივრცეში სადოქტორო განათლების განვითარების კონცეპტუალური ჩარჩოს შემუშავებაში სადოქტორო განათლების საბჭომ (EUA-CDE) განმსაზღვრელი როლი შეასრულა და დღესდღეობით იგი ყველაზე მასშტაბური ევროპული ქსელია ამ სფეროში, რომელიც მოიცავს 260-ზე მეტ უნივერსიტეტსა და ინსტიტუტს 36 ქვეყნიდან.
ევროპის უნივერსიტეტების ასოციაციის სადოქტორო განათლების საბჭო (EUA-CDE) წევრ უნივერსიტეტებს შესაძლებლობას აძლევს გაიზიარონ საუკეთესო გამოცდილება, განახორციელონ ერთობლივი პროექტები, ღონისძიებები და სხვა აქტივობები სადოქტორო განათლებისა და კვლევების მიმართულებით; რეგულარულად მიიღონ ინფორმაცია სადოქტორო სწავლებასთან დაკავშირებულ ახალ ტენდენციებზე ევროპასა და მსოფლიოში; მონაწილეობა მიიღონ საბჭოს მიერ დაგეგმილ თემატურ კონფერენციებსა და ვორკშოპებში და ისარგებლონ წარმომადგენლობითი ხმის უფლებით სადოქტორო განათლებასთან დაკავშირებულ საკითხებზე საბჭოს წევრთა შეხვედრებზე.
აღნიშნულ ორგანიზაციაში წევრობა აღმოსავლეთ ევროპის უნივერსიტეტს აძლევს საუკეთესო შესაძლებლობას სადოქტორო სწავლებისა და კვლევების ინტერნაციონალიზაციის ხელშეწყობისა და სადოქტორო განათლების განვითარების მიმართულებით.