2026 წლის 17–19 ივნისს, ირლანდიაში, გოლუეის უნივერსიტეტის (University of Galway) მასპინძლობით, გაიმართა ევროპის უნივერსიტეტების ასოციაციის სადოქტორო განათლების საბჭოს (EUA-CDE) ყოველწლიური კონფერენცია, რომლის მთავარ თემას წარმოადგენდა „სადოქტორო კვლევები და ტალანტი საზოგადოების განვითარებისთვის“.
კონფერენციაზე აღმოსავლეთ ევროპის უნივერსიტეტს წარმოადგენდნენ ბიზნესისა და ინჟინერიის ფაკულტეტის დეკანი, პროფესორი ვასილ კიკუტაძე და იურიდიულ და სოციალურ მეცნიერებათა ფაკულტეტის ასოცირებული პროფესორი ზურაბ აზნაურაშვილი.
ღონისძიების ძირითადი ნაწილი დაეთმო სადოქტორო კვლევების საზოგადოებრივ საჭიროებებთან ადაპტაციისა და მათი პრაქტიკული მნიშვნელობის გაძლიერების საკითხებს. კონფერენციის ერთ-ერთ მთავარ თემას წარმოადგენდა კვლევების ინტეგრაცია საზოგადოებრივ და კერძო სექტორთან. განსაკუთრებული აქცენტი გაკეთდა დოქტორანტების მომზადებაზე აკადემიური სივრცის მიღმა არსებული შრომის ბაზრისთვის, რაც ეფუძნება ზალცბურგის პრინციპებს. ასევე წარდგენილ იქნა 2025–2026 წლების EUA-CDE-ის თემატური ჯგუფის დასკვნები, რომლებიც შეეხება საზოგადოებრივ აქტორებთან თანამშრომლობის საუკეთესო პრაქტიკებს სადოქტორო განათლების სფეროში. ყურადღება გამახვილდა ინტერდისციპლინური თანამშრომლობის მნიშვნელობაზეც.
ვიზიტის ფარგლებში აღმოსავლეთ ევროპის უნივერსიტეტის წარმომადგენლები გაეცნენ ევროპული უნივერსიტეტების წარმატებულ პრაქტიკას. განსაკუთრებული ინტერესი გამოიწვია პორტუგალიის ავეიროს უნივერსიტეტის სადოქტორო სკოლის „Immersive Week“ მოდელმა, რომელიც დოქტორანტებისთვის ტრანსფერული უნარების, ხელოვნური ინტელექტის ინსტრუმენტებისა და კვლევის ეთიკის საკითხების ინტენსიურ სწავლებას უზრუნველყოფს.
კონტაქტები დამყარდა სხვადასხვა საერთაშორისო უნივერსიტეტის წარმომადგენლებთან. დელეგატები გაეცნენ უტრეხტის უნივერსიტეტის სადოქტორო კომპეტენციების მოდელს, შვეიცარიის დისტანციური უნივერსიტეტის ინტერდისციპლინურ მიდგომებსა და ტრინიტის კოლეჯის გამოცდილებას მოკლევადიანი საპილოტე ფორმატებთან დაკავშირებით, რაც სადოქტორო განათლების სისტემური განახლებისთვის ეფექტიან ინსტრუმენტს წარმოადგენს.
კონფერენციის ფარგლებში დამყარებული საერთაშორისო კონტაქტები შექმნის უცხოელი ექსპერტების უნივერსიტეტის სამეცნიერო პროექტებში ჩართვის, ერთობლივი კვლევების განხორციელებისა და საერთაშორისო საგრანტო პროგრამებში მონაწილეობის შესაძლებლობას.