ჰუბერტ ჰამფრის სახელობის ფელოუშიფის პროგრამა ხელს უწყობს ლიდერული უნარ-ჩვევების გაძლიერებას საერთაშორისო პროფესიონალებს შორის, რომლებიც თანამშრომლობენ ადგილობრივი და გლობალური გამოწვევების მოსაგვარებლად და ცვლილებების ხელშესაწყობად საყოველთაო კეთილდღეობისათვის. ამერიკელ კოლეგებთან აკადემიური სწავლისა და პროფესიული განვითარების გზით, ეს მზარდი გლობალური ქსელი აყალიბებს საუკეთესო პრაქტიკულ გამოცდილებას კრიტიკულად მნიშვნელოვან სფეროებში, რათა გაზარდოს სოციალური და ინსტიტუციური შესაძლებლობები, ხელი შეუწყოს ადამიანის უფლებათა, თავისუფლებათა განვითარებას და უზრუნველყოს მდგრადი/სტაბილური გარემო.
კონფერენციებში, ქსელურ თუ სამუშაო შეხვედრებსა და სემინარებში მონაწილეობა უზრუნველყოფს სტიპენდიატთა არსებული ცოდნისა და წარმოდგენების გაფართოებას, როგორც მათ სამუშაო, ისე გლობალურ საკითხებზე. სასტიპენდიო პროგრამის კულმინაციას კი ამერიკულ ორგანიზაციებთან ექვსკვირიანი სამუშაო გამოცდილების მიღების შესაძლებლობა წარმოადგენს.
სტიპენდიის ერთ-ერთ მნიშვნელოვან ნაწილს წარმოადგენს მასპინძელი უნივერსიტეტის მიერ ორგანიზებული ჰამფრის სპეციალური ერთწლიანი სემინარი, სადაც სტიპენდიატები ეცნობიან იმ უნარებსა და ხედვებს, რომლებიც მნიშვნელოვანია მათი, როგორც გლობალური ლიდერების ჩამოსაყალიბებლად. მონაწილეები ერთმანეთს უზიარებენ მიდგომებს მათი რეგიონისათვის ნიშანდობლივი, საერთო პრობლემების თაობაზე და იღებენ ინფორმაციას ამერიკული კულტურისა და საზოგადოების მრავალ ასპექტის შესახებ.
სტიპენდიატები განთავსდებიან შვიდიდან თხუთმეტკაციან ჯგუფებად აშშ-ს შერჩეულ უნივერსიტეტებში, რომლებიც მორგებულნი იქნება მათ აკადემიურ და პროფესიულ საჭიროებებს. ფელოუშიფის პროგრამის ფარგლებში გამართულ გლობალური ლიდერობის ფორუმზე კი სტიპენდიატები შეხვდებიან ჰამფრის კოლეგებს 13 მასპინძელი კამპუსიდან და შეძლებენ მათთან მეგობრული და პროფესიული კავშირების დამყარებას.