აღმოსავლეთ ევროპის უნივერსიტეტის (EEU) დაფინანსებითა და კინგსთან პარტნიორობით, იმერეთის რეგიონში, სკოლის მოსწავლეებისთვის ინტელექტის ოლიმპიადა ჩატარდა. გამარჯვებული მოსწავლეების დაჯილდოების ცერემონია 21 ივნისს, ქ. ქუთაისის კულტურის ცენტრში გაიმართა.
დაჯილდოების ცერემონიალს აღმოსავლეთ ევროპის უნივერსიტეტის რექტორთან, კახაბერ ლაზარაშვილთან ერთად, იმერეთში სახელმწიფო რწმუნებულის მოადგილე, ლევან კიკნაველიძე, ტყიბულის მუნიციპალიტეტის მერი, დავით ჩერქეზიშვილი და ადგილობრივი ხელისუფლების სხვა წარმომადგენლები დაესწრნენ.
ინტელექტის ოლიმპიადის პირველი ტური იმერეთის 7 ქალაქში (ქუთაისი, ვანი, სამტრედია, ხონი, ზესტაფონი, ჭიათურა, ტყიბული) გაიმართა და 600-მდე სკოლის მოსწავლე ჩაერთო, ხოლო 11 ივნისს გამართულ ფინალურ ტურში 300-ზე მეტი კონკურსანტი მონაწილეობდა და საუკეთესო შედეგის მქონე სამეული გამოვლინდა.
აღმოსავლეთ ევროპის უნივერსიტეტის 2023 წლის გაზაფხულის სეზონის იმერეთის ინტელექტის ოლიმპიადის გამარჯვებულები გახდნენ:
- 1-ელი ადგილი – ლუკა ლიკლიკაძე, ქ. ქუთაისის N41-ე საჯარო სკოლა;
- მე-2 ადგილი – ანა სალდაძე, ქ. ქუთაისის 41-ე საჯარო სკოლა;
- მე-2 ადგილი – მათე გიორბელიძე, ქ. ქუთაისის 41-ე საჯარო სკოლა;
- მე-3 ადგილი – ალექსი კუბლაშვილი, ქ. ტყიბულის მე-4 საჯარო სკოლა.
გამარჯვებულ მოსწავლეებს აღმოსავლეთ ევროპის უნივერსიტეტისგან სპეციალური ფულადი პრიზები, საზაფხულო ბანაკის ვაუჩერი და დიპლომები გადაეცათ. დამატებითი ფულადი პრიზები და სიმბოლური საჩუქრები ქალაქების მიხედვით გამარჯვებულებისთვის დააწესეს, ქუთაისის, ტყიბულის, ზესტაფონის, ვანისა და ხონის მუნიციპალიტეტების მერებმა.
ინტელექტის ოლიმპიადის ფინალური ტურის ყველა მონაწილეს EEU-სა და KINGS-ისგან გადაეცათ სერტიფიკატები;
ინტელექტის ოლიმპიადის მთავარი მიზანია, მოსწავლეებს დაეხმაროს საკუთარი ინტელექტუალური უნარ-ჩვევების გაზომვაში, ასევე წაახალისოს და მხარი დაუჭიროს ნიჭიერ ახალგაზრდებს. EEU აგრძელებს ინტელექტის ოლიმპიადას და მომდევნო სეზონი 2024 წლის გაზაფხულზე გაიმართება.
