აღმოსავლეთ ევროპის უნივერსიტეტის (EEU) ორგანიზებით 29 მაისს, EEU-ს სტუდენტებისა და თანამშრომლებისთვის გაიმართა შეხვედრა პოლონეთსა და ცენტრალურ-აღმოსავლეთ ევროპაში ცნობილ მკვლევრებთან. ღონისძიებას ესწრებოდნენ საქართველოში პოლონეთის ელჩი მარიუშ მაშკიევიჩი და აღმოსავლეთ ევროპის უნივერსიტეტის რექტორი კახაბერ ლაზარაშვილი.
შეხვედრის თემას წარმოადგენდა დეზინფორმაციის მუშაობის თავისებურება: თანამედროვე რუსეთის ამბავი.
ღონისძიების სპიკერები იყვნენ:
კშიშტოფ კოზლოვსკი – ვარშავის ეკონომიკის სკოლის (SGH) ვიცე-რექტორი სასწავლო და სტუდენტურ საკითხებში, საერთაშორისო კვლევების ინსტიტუტის (SGH) ხელმძღვანელი. ის ახორციელებს კვლევებს პოლიტიკურ თეორიაზე, მეცნიერებათა მეთოდოლოგიასა და თამაშების თეორიაზე. კშიშტოფ კოზლოვსკი არის მრავალი პუბლიკაციის ავტორი ცენტრალური და აღმოსავლეთ აზიის შესახებ;
ფილიპ ბრიიკა – საერთაშორისო უსაფრთხოების პროგრამის ანალიტიკოსი, პოლონეთის მეცნიერებათა აკადემიის პოლიტიკური კვლევების ინსტიტუტის ასისტენტ-პროფესორი. ის არის ნატოს საჯარო დიპლომატიის სამმართველოს კვლევითი გრანტებით დაფინანსებული დეზინფორმაციის წინააღმდეგ ბრძოლის საერთაშორისო პროექტების მონაწილე. მისი საექსპერტო სფერო მოიცავს ჰიბრიდულ საფრთხეებს და ნატო/ევროკავშირის კრიზისებზე რეაგირების ოპერაციებს.
მოწვეულმა სტუმრებმა განიხილეს ის ელემენტები, რომლებიც რუსეთის ფედერაციის საინფორმაციო ომის განუყოფელი ნაწილია.
შეხვედრას მოდერაციას უწევდა გრიგოლ ჯულუხიძე – EEU-ს ასოცირებული პროფესორი, საერთაშორისო ურთიერთობების დოქტორი, ანალიტიკური ცენტრის ,,საგარეო პოლიტიკის საბჭოს’’ დამფუძნებელი და დირექტორი, პოლონეთის პარლამენტის ვიშეგრადის ჯგუფის სახელმწიფოთა ანალიტიკოსი, მისი კვლევის სფეროს წარმოადგენს ვიშეგრადის სახელმწიფოების პოლიტიკური სისტემებისა და რუსული პროპაგანდის მიმართულება.
ღონისძიების ფარგლებში ასევე განხორციელდა წიგნის, „დეზინფორმაციის საწინააღმდეგო პლატფორმა” პრეზენტაცია. ავტორებმა აღნიშნული წიგნი აუდიტორიას საჩუქრად გადასცეს.
ბოლოს კი გაიმართა შემაჯამებელი დისკუსია, რომელშიც აღმოსავლეთ ევროპის უნივერსიტეტის სტუდენტები აქტიურად ჩაერთვნენ.
