2023 წლის 15 ნოემბერს აღმოსავლეთ ევროპის უნივერსიტეტში გაიმართა სტუდენტთა საერთაშორისო სამეცნიერო კონფერენცია თემაზე – “განათლება და მიგრაცია”.
კონფერენციის მიზანი იყო:
- განათლებასა და მიგრაციას შორის კავშირების კვლევის შედეგების გაზიარება;
- საუკეთესო პრაქტიკების შესახებ ინფორმაციების გაცვლა;
- არსებული გამოწვევებისა და შესაძლებლობების თაობაზე მსჯელობა.
კონფერენციაზე მისასალმებელი სიტყვით გამოვიდნენ აღმოსავლეთ ევროპის უნივერსიტეტის რექტორი – დოქტორი კახაბერ ლაზარაშვილი და მიგრაციისა და დიასპორის კვლევითი ცენტრის დირექტორი – ქალბატონი ლელა გოგინავა.
კონფერენციის პირველ ნაწილში, მთავარ მომხსენებლად მოწვეული იყო ლატვიის უნივერსიტეტის მიგრაციისა და დიასპორის კვლევითი ცენტრის დირექტორი და ამავე უნივერსიტეტის სოციალურ მეცნიერებათა ფაკულტეტის ასოცირებული პროფესორი, დოქტორი ინტა მიერინა, რომელმაც წარმოადგინა მოხსენება თემაზე: „ხიდების მშენებლობა დიასპორასთან განათლებისა და მეცნიერების სფეროში: ლატვიის მაგალითი”.
მეორე მთავარ მომხსენებლად მოწვეული იყო საქართველოს მეცნიერებისა და განათლების სამინისტროს სკოლამდელი განათლების პოლიტიკის მრჩეველი მასაჰირო კატო, რომელმაც წარმოადგინა მოხსენება თემაზე: საერთაშორისო ჩარჩოები და ვალდებულება ინკლუზიური, სამართლიანი და ხარისხიანი განათლებისთვის ლტოლვილი და იძულებით გადაადგილებული ბავშვებისთვის“.
კონფერენციის მეორე ნაწილი დაეთმო საქართველოს სხვადასხვა უნივერსიტეტის სტუდენტთა ნაშრომების პრეზენტაციას და დისკუსიას აღნიშნული თემატიკის გარშემო.