აღმოსავლეთ ევროპის უნივერსიტეტის (EEU) ჯანდაცვის მეცნიერებათა ფაკულტეტის ინიციატივითა და EEU-ს უწყვეტი განათლების ცენტრის (LLC) ორგანიზებით მიმდინარე წლის 28-31 მაისს გაიმართა ტრენინგ-კურსი: „სწავლებისა და შეფასების მეთოდები სამედიცინო განათლებაში“.
კურსი მიზნად ისახავდა ჯანდაცვის მეცნიერებათა ფაკულტეტის საგანმანათლებლო პროგრამების განმახორციელებელი პერსონალისთვის კვალიფიკაციის ამაღლებას სამედიცინო განათლების სწავლებისა და შეფასების თანამედროვე მეთოდოლოგიის მიმართულებით.
ტრენინგს გაუძღვა მედიცინის დოქტორი, არაბეთის გაერთიანებული საამიროების უნივერსიტეტის ასოცირებული პროფესორი აიჰან ს. კალისკან. მას აქვს მრავალწლიანი გამოცდილება სამედიცინო განათლების ადმინისტრირების, მონიტორინგისა და სწავლა-სწავლების მიმართულებით. ის არის თურქეთისა და ევროპის სხვადასხვა სასერტიფიკაციო საგამოცდო საბჭოს წევრი და შემფასებელი.
კურსი მოიცავდა როგორც თეორიულ, ისე პრაქტიკულ კომპონენტებს, რომელთა მეშვეობით მონაწილეებს შესაძლებლობა ჰქონდათ, გაეღრმავებინათ ცოდნა და განევითარებინათ შესაბამისი პრაქტიკული უნარები. ტრენინგის პროგრამა შედგებოდა შემდეგი ძირითადი საკითხებისგან:
- სამედიცინო განათლების შეფასების თანამედროვე სისტემის გაცნობა, ცოდნის შეფასება, ღია და დახურული კითხვების ფორმულირება და შედგენა;
- ქმედების შეფასება, ობიექტურად სტრუქტურირებული პრაქტიკული გამოცდა (OSPE); ობიექტურად სტრუქტურირებული კლინიკური გამოცდა (OSCE); ორგანიზება და პილოტირება;
- სამუშაო ადგილზე დაფუძნებული შეფასება (WPBA): მინი-კლინიკური შეფასების სავარჯიშო (Mini-CEX), პროცედურულ უნარებზე პირდაპირი დაკვირვება (DOPS), 3600-იანი შეფასება, პორტფოლიო.
- პრობლემაზე დაფუძნებული სწავლება (PBL), პრობლემაზე დაფუძნებული სწავლებისთვის სცენარების შექმნა და ჯგუფების ორგანიზება, PBL სესიების წარმართვა და შეფასება;
კურსი წარიმართა ინტერაქტიულ რეჟიმში, მონაწილეები აქტიურად იყვნენ ჩართულნი როგორც თეორიულ სესიებში, ისე პრაქტიკულ სავარჯიშოებში.
ტრენინგი განხორციელდა აღმოსავლეთ ევროპის უნივერსიტეტის სრული ფინანსური მხარდაჭერით.
ტრენინგ-კურსის მონაწილეებს გადაეცათ სერტიფიკატები.
