აღმოსავლეთ ევროპის უნივერსიტეტის ვიცე-რექტორი საერთაშორისო და ადმინისტრაციულ საკითხებში, ასისტენტ-პროფესორი თეა იმედაძე და ვიცე-რექტორი სასწავლო პროცესის ადმინისტრირების საკითხებში, ასოცირებული პროფესორი რუსუდან ჩიქოვანი, მიმდინარე წლის 19-25 ივნისს Erasmus+ პროგრამის პერსონალის მობილობის ფარგლებში იმყოფებოდნენ სოციალურ და პოლიტიკურ მეცნიერებათა პანთეონის უნივერსიტეტში (ათენი, საბერძნეთი). ვიზიტი მიზნად ისახავდა უნივერსიტეტებს შორის თანამშრომლობის განვითარებასა და აკადემიური კავშირების გაღრმავებას.
ვიზიტის ფარგლებში, გაიმართა შეხვედრები პანთეონის უნივერსიტეტის რექტორთან, ფაკულტეტების წარმომადგენლებთან, აკადემიურ პერსონალთან და საერთაშორისო ურთიერთობების დეპარტამენტთან. მხარეებმა ერთმანეთს საკუთარი უნივერსიტეტების შესახებ ინფორმაცია, საგანმანათლებლო პროგრამები და სამეცნიერო პროექტები გააცნეს, გაუზიარეს გამოცდილება და დასახეს სამომავლო თანამშრომლობის გეგმები როგორც საგანმანათლებლო, ასევე სამეცნიერო მიმართულებით. ვიცე-რექტორმა, თეა იმედაძემ წაიკითხა ლექცია თემაზე – „ასოცირების შეთანხმება, ევროკავშირი და საქართველო“.
ვიზიტის ფარგლებში, გაფორმდა უნივერსიტეტებს შორის ურთიერთთანამშრომლობის მემორანდუმი, რომელიც მოიცავს სტუდენტებისა და პერსონალის გაცვლას, ერთობლივი საგანმანათლებლო და კვლევითი პროექტების განხორციელებას, სამეცნიერო და სასწავლო რესურსების გაცვლასა და გამოცდილების გაზიარებას. მემორანდუმს ხელი მოაწერეს პანთეონის უნივერსიტეტის ვიცე-რექტორმა საერთაშორისო ურთიერთობებისა და პარტნიორობის მიმართულებით, პროფესორმა მარიანა ფსილამ და აღმოსავლეთ ევროპის უნივერსიტეტის ვიცე-რექტორმა საერთაშორისო და ადმინისტრაციულ საკითხებში თეა იმედაძემ.
EEU-ს დელეგაციის ვიზიტი პანთეონის უნივერსიტეტში მნიშვნელოვანი ეტაპი იყო უნივერსიტეტებს შორის თანამშრომლობის განმტკიცებაში. ეს ერთობლივი ძალისხმევა EEU-ს სტუდენტებსა და აკადემიურ პერსონალს, სთავაზობს საინტერესო პერსპექტივებს, აძლევს განვითარების ფასდაუდებელ შესაძლებლობებს.